پاکستان مسلم لیگ (ن) کی ترجمان مریم اورنگزیب کا وزیراعظم کی جانب سے ہنرمند نوجوان پروگرام  کے افتتاح پر ردعمل ظاہر کیا ہے۔

تفصیلات کے مطابق پاکستان مسلم لیگ (ن) کی ترجمان مریم اورنگزیب نے وزیراعظم عمران خان کو تنقید کا نشانہ بناتے ہوئے کہا ہے کہ عمران صاحب تقریروں سے روٹی، روزگار اور کاروبار نہیں ملتاہے۔

انہوں نے کہا کہ عمران صاحب آپ کی تقریروں سے عوام کو روزگار نہیں ملے گا ، مہنگائی کی شرح کم نہیں ہو گی، آپ کی تقریروں سے عوام کو پچاس لاکھ گھر ایک کروڑ نوکری نہیں ملے گی اور نہ ہی آپ کی تقریر سے لوگ بجلی اور گیس کے بل ادا کرنے کے قابل نہیں ہوجائیں گے۔

مریم اورنگزیب کا مزید کہنا تھا کہ عمران صاحب آپ کی تقریروں سے عوام کو ہسپتال میں علاج نہیں ملے گا، وہ دوائی نہیں خرید سکتے اور نہ ہی انصاف تقریروں سے ملتا ہے۔

وزیراعظم نے ہنرمند جوان پاکستان پروگرام کا افتتاح کردیا

تنقید کرتے ہوئے ان کا مزید کہنا تھا کہ آپ اپنے دوستوں اور باجی کے لئے نیب ترمیمی آرڈیننس لائے اور سیاسی مخالفین سزائے موت کی چکیاں دی گئی اور صرف سولہ ماہ میں نواز شریف کا چلتا ہوا نوجوان پروگرام بند کیا، پھر سولہ ماہ بعد اُسی پروگرام پہ نئی تختی لگا دی۔

انہوں نے کہا کہ عمران صاحب نے لاکھوں نوجوانوں سے روزگار چھین کر انہیں مایوسی و ناامیدی کی دلدل میں پھینک دیا لیکن وزیراعظم نوازشریف کی سکیم کا نام بدلنے سے نوجوانوں کو روزگار نہیں ملے گا۔

مریم اورنگزیب کا اس موقع پر کہنا تھا کہ حکومت کی جانب سے ہر ماہ ہنرمند پروگرام کا افتتاح کرکے نیا ڈرامہ رچایا جاتا ہے، ڈراموں کی تبدیلی سے حقیقت نہیں بدلے گی۔

واضح رہے کہ اس سے قبل وزیراعظم عمران خان نے نوجوان ہنرمند پروگرام کا افتتاح کیا تھا۔

ہنرمند نوجوان پروگرام کی افتتاحی تقریب سے خطاب کرتے ہوئے وزیراعظم کا کہنا تھا کہ نوجوان ملک کا سب بڑا اثاثہ ہیں لیکن ماضی میں ان کی تعلیم اور ہنر پر توجہ نہیں دی گئی۔

انہوں نے تقریب میں شریک نوجوانوں کا حوصلہ بڑھاتے ہوئے انھیں مخاطب کرتے ہوئے کہا کہ قوموں کی زندگی میں اچھے برے وقت آتے رہتے ہیں۔ برے وقت میں اپنی اصلاح کرنے کا موقع ملتا ہے، میں پاکستان کا روڈ میپ دیتا ہوں کہ ہمارا ملک کس طرف جا رہا ہے۔