ڈی جی آئی ایس پی آر میجر جنرل آصف غفور  کا کہنا ہے کہ افواج پاکستان کی کامیابی میں میڈیا کا اہم کردار رہا ہے۔

دفاعی رپورٹرز سے گفتگو کرتے ہوئے ڈی جی آئی ایس پی آر میجر جنرل آصف غفور کا کہنا تھا کہ دفاعی رپورٹرز میڈیا ٹیم میری بنیادی ٹیم رہی ہے۔

 میجر جنرل آصف غفور نے کہا کہ دفاعی رپورٹرز نے بھر پور طریقے سے افواج پاکستان کی رپورٹنگ کی اور ذمہ دارانہ رپورٹنگ سے افواج کے جذبہ کو مظبوط کیا۔ میڈیا نے افواج اور شہیدوں کے لواحقین کے دل جیتے۔

ڈی جی آئی ایس پی آر نے کہا کہ پاکستان نے پچھلی دو دہائیوں میں دہشت گردی کے خلاف بقا کی جنگ لڑی ہے۔اس جنگ میں دفاعی رپورٹرز نے افواج کا بھر پور ساتھ نبھایا ہے۔

انہوں نے کہا کہ فروری 2019 میں پاک بھارت جنگ دستک دے چکی تھی لیکن افواج پاکستان کی تیاری، موثر جواب نے امن کا راستہ ہموار کیا۔ تینوں سروسز نے اپنے آپ کو قابل فورس کے طور پر منوایا۔

میجر جنرل آصف غفور کا کہنا تھا کہ پاکستانی قیادت نے جنگ کے اس خطرے کو احسن طریقے سے نمٹایا۔  آرمی چیف جنرل قمر  جاوید باجوہ کی اعلیٰ ملٹری حکمت عملی نے جنوبی ایشیا ءکو بہت بڑی تباہی سے بچایا۔

میجر جنرل بابر افتخار ڈی جی آئی ایس پی آر تعینات

ڈی جی آئی ایس پی آر نے کہا کہ بھارتی حکومت اور ملٹری لیڈر شپ غیر ذمہ دارانہ بیانات دے رہے ہیں۔ جو فوج آٹھ ملین کشمیریوں کو 71سال سے شکست نہیں دے سکی وہ207ملین پاکستانیوں کو کیسے شکست دے سکتی ہے۔

ان کا کہنا تھا جنگ میں کسی کی ہار جیت نہیں ہوتی،  انسانیت ہارتی ہے تاہم افواج پاکستان کسی بھی مسلط شدہ جنگ کا بھرپور جواب دےگی۔

میجر جنرل آصف غفور نے مزید کہا کہ انڈین لیڈر شپ کہتی ہے 7سے 10 دن میں پاکستان کو ختم کر دیں گے۔ان سے کہتا ہوں کہ پاکستان اور افواجِ پاکستان ہمیشہ آپ کو سرپرائز کریں گی۔

ڈی جی آئی ایس پی آر نے کہا کہ بات صرف7 سے 10 دن کی نہیں ،اس سے پہلے اور بعد کی بھی ہے۔ہم نے پہلے بھی کہا تھا کہ جنگ شروع آپ کریں گے لیکن  ختم ہم کریں گے۔

انہوں نے کہا کہ پاکستانی سول و ملٹری لیڈر شپ خطے میں امن کی خواہاں ہے۔ بھارتی سول ملٹری لیڈر شپ کو بھی خطے میں امن کی اہمیت کا ندازہ ہونا چاہیے۔

کشمیر کے حوالے  سے میجر جنرل آصف غفور کا کہنا تھا بھارتی لیڈر شپ کو چاہیے کہ مقبوضہ کشمیر میں ظلم وستم کو بند کریں۔مقبوضہ کشمیر میں لگی آگ پورے خطے میں پھیل سکتی ہے،دُنیا کو بھی اس خطرے کا ادراک ہو نا چاہیے۔

ڈی جی آئی ایس پی آرنے کہا کہ آرمی چیف نے ملکی  اور خطے کےامن  کے لیے اہم اور مشکل اقدامات کیے۔ آرمی چیف نے مذہبی ہم آہنگی و مدرسہ ریفارمز میں  بھی اہم کردار ادا کیا۔

ان کا مزید کہنا تھا کہ باجوہ ڈاکٹرائن ملکی سلامتی پر کوئی بھی سمجھوتہ کیے بغیر ملک اور خطے میں امن لانا ہے۔ جنرل باجوہ کی ملٹری ڈپلومیسی نے اقوامِ عالم میں پاکستان کا مقام بلند کیا۔

میجر جنرل آصف غفور نے کہا کہ آرمی چیف نے آپریشن شیر دل سے ضرب عضب تک کی کامیابیوں کو ردالفساد کے ذریعے مستحکم کیا۔ ردالفساد سب سے مشکل آپریشن اور دائمی امن  کے لیےاہم ترین مرحلہ ہے۔

ڈی جی آئی ایس پی آر کا کہنا تھا کہ بطور ترجمان کوئی بات ذاتی رائے نہیں ہوتی۔ ملٹری ترجمان پالیسی سے مبرا کوئی بات نہیں کر سکتا۔ اگربھارتی میرے جانے پر خوش ہیں تو میرے لیے یہ اعزاز ہے۔

انہوں نے مزید کہا کہ آئی ایس آئی دُنیا کی مانی ہوئی انٹیلی جنس ایجنسی ہے۔آئی ایس آئی ، ایم آئی اور آئی بی نے مل کر بہت سے دہشت گردی کے واقعات کو روکا ہے۔ہمیں اپنی انٹیلی جنس ایجنسیوں پر فخر ہے۔

میجر جنرل آصف غفور نے کہا  کہ  ہم سب کا ایک ’عہدِوفا ‘ہے۔ عہد وفا ،وطن ، وطن کی مٹی و ہم وطنوں کے ساتھ۔عہدِوفا ،کشمیری بہن بھائیوں کے ساتھ۔انشااللہ ہم اس عہد کو وفا کریں گے۔

ڈی جی آئی ایس پی آر نے کہا کہ یکم فروری سے نئے ڈی جی اپنی ذمہ داریاں سنبھالیں گے۔آپ سب کے تعاون کا شکریہ، میڈیا کا شکریہ۔ پاکستانی عوام بالخصوص سوشل میڈیا پر نوجوانوں کا شکریہ۔