وزیراعلیٰ پنجاب سردار عثمان بزدار  نے کہا ہے کہ نیا پاکستان ہاؤسنگ اسکیم کم آمدن والے لوگوں کیلئے اپنی چھت کاخواب پورا کرے گی۔

تفصیلات کے مطابق وزیراعلیٰ پنجاب سردار عثمان بزدار کی زیرصدارت اعلیٰ سطح کا اجلاس ہوا، جس میں ہاؤسنگ سیکٹرکی کارکردگی کا جائزہ لیاگیا۔

 عثمان بزدار  نے کہا کہ ہا ؤسنگ سیکٹرمیں سرمایہ کاری کے بے پناہ مواقع موجود ہیں اور آبادی میں اضافے کے ساتھ نئے شہر بسانے کی ضرورت بڑھی ہے۔

 وزیراعلیٰ پنجاب سردار عثمان بزدار نے یہ بھی کہا کہ کم آمدن والے لوگوں کے لئے گھروں کی تعمیر کے منصوبے کو جلد ازجلد پایہ تکمیل تک پہنچانا چاہتے ہیں جبکہ ہاؤسنگ سیکٹر میں نجی شعبہ کی شمولیت کے حوصلہ افزاء نتائج سامنے آئیں گے –

صوبائی وزراء میاں محمودالرشید،ہاشم جواں بخت، رکن صوبائی اسمبلی مسرت جمشید چیمہ، چیف سیکرٹری، وائس چیئرمین ایل ڈی اے شیخ محمد عمران، ڈپٹی چیئرمین نیا پاکستان ہاؤسنگ اتھارٹی، پرنسپل سیکرٹری وزیراعلیٰ،سیکرٹری خزانہ، ڈی جی ایل ڈی اے، سپیشل مانیٹرنگ یونٹ کے سربراہ اورمتعلقہ حکام کی اجلاس میں شرکت کی۔

وزیراعلیٰ پنجاب کی زیرصدارت اعلیٰ سطح کا اجلاس

واضح رہے اس سے قبل بھی وزیراعلیٰ پنجاب سردار عثمان بزدار کی زیرصدارت وزیراعلیٰ آفس میں اعلیٰ سطح کا اجلاس ہوا، جس میں صوبے میں آٹے و گندم کی قیمتوں اور ڈیمانڈ و سپلائی کا جائزہ لیا گیا تھا۔

وزیراعلیٰ پنجاب عثمان بزدار نے  گندم کا سرکاری کوٹہ اوپن مارکیٹ میں فروخت کرنے والی فلور ملوں کے خلاف بلاامتیاز کارروائی کا حکم دیتے ہوئے کہا تھا کہ کسی فلور مل کو گندم کا کوٹہ اوپن مارکیٹ میں فروخت کرنے کی اجازت نہیں دی جاسکتی جبکہ خلاف ورزی پر فلور ملوں کے خلاف قواعد و ضوابط کے تحت کارروائی ہوگی۔

وزیراعلیٰ پنجاب نے مزید کہا تھا کہ صوبے کے عوام کا مفاد سب سے زیادہ مقدم ہے، عوام کو آٹے کی دستیابی کے حوالے سے کوئی شکایت نہیں ہونی چاہیئے جبکہ جس ضلع سے شکایت ملی، میں ایکشن لوں گا۔