آرمی چیف کی مدت ملازت میں توسیع سے متعلق آرمی ترمیمی ایکٹ بل کو قائمہ کمیٹی برائے دفاع نے منظور کرلیا ہے۔

تفصیلات کے مطابق اجلاس کے بعد میڈیا سے بات کرتے ہوئے وزیر دفاع پرویز خٹک نے کہا کہ ہمارے نظریات مختلف ہو سکتے ہیں لیکن ہر چیز پر سیاست نہیں ہوتی، پورا پاکستان فوج کے ساتھ کھڑا ہے، تمام جماعتوں نے غیر مشروط طور پر بل کی حمایت کی ہے۔

قائمہ کمیٹی میں بل کی منظوری پر وزیر دفاع پرویز خٹک کی جانب سے قوم کو مبارکباد پیش کی گئی۔

اپنے ایک بیان میں وزیر دفاع کا کہنا تھا کہ ساری قوم کو مبارک ہو، سب نے اس معاملے میں یکجہتی دکھائی ہے۔

قومی اسمبلی نے آرمی ایکٹ ترمیمی بل کی منظوری دیدی

پرویز خٹک نے کہا کہ سروسز ایکٹ میں ترمیم کے بلز قائمہ کمیٹی برائے دفاع نے متفقہ طور پر منظور کرلیے ہیں۔

ان کا یہ بھی کہنا تھا کہ اپوزیشن نے بعض ترامیم دی تھیں لیکن وہ بل کی حمایت کریں گے۔

وزیر دفاع نے بتایا کہ ترمیمی بلز اب کل قومی اسمبلی میں پیش کیے جائیں گے۔

واضح رہے کہ معاون خصوصی ڈاکٹر فردوس عاشق اعوان نے سماجی رابت کی ویب سائٹ پر ٹوئٹ کرتے ہوئے آرمی ایکٹ ترمیمی بل کے متعلق کہا ہے کہ اہم قومی معاملے پر تمام سیاسی قوتوں کا یکساں موقف ملک میں سیاسی پختگی اور جمہوریت کی مضبوطی کا مظہر ہے۔

انہوں نے مزید کہا کہ سیاسی جماعتوں کی نیشنل سکیورٹی کے اہم معاملہ پر ہم آہنگی ملکی سالمیت، دفاع اور قومی مفاد کو مقدم رکھنے کا واضح ثبوت ہے۔

یاد رہے کہ س سے قبل قومی اسمبلی کے اجلاس میں پاکستان ائیر فورس ترمیمی ایکٹ 2020 اورپاکستان بحریہ ترمیمی ایکٹ 2020 بھی وزیر دفاع نے پیش کیا تھا جس کے بعد تینوں بلوں کو قائمہ کمیٹی برائے دفاع کو بھیج دیا گیا تھا اور اسمبلی کا اجلاس کل صبح 11 بجے تک ملتوی کردیا گیاتھا۔

بعد ازاں حکومت اور اپوزیشن کے درمیان قائمہ کمیٹی برائے دفاع کا اجلاس آج ہی طلب کرنے پر اتفاق ہوا اور ان بلوں کو آج ہی کمیٹی سے منظور کروانے پر اتفاق رائے قائم ہوا۔

پیپلزپارٹی کی جانب سےآرمی ایکٹ ترمیمی بل کی مشروط حمایت کا اعلان کیا گیاتھا۔