پاک فوج کے سپہ سالار جنرل قمر جاوید باجوہ نے ایک بار پھر آسٹریلیا کے جنگلوں میں لگی آگ پر قابو پانے کیلئے تعاون کی پیشکش کی ہے، انہوں نے یہ پیشکش پاکستان کے دورے پر آئے  آسٹریلین وائس چیف آف ڈیفنس فورسز وائس ایڈمرل ڈیوڈ جانسٹن سے بات چیت کے دوران کی ہے۔

آئی ایس پی آر کے مطابق آسٹریلین وائس چیف آف ڈیفنس فورسزوائس ایڈمرل ڈیوڈجانسٹن نے جی ایچ کیو راولپنڈی کا دورہ کیا، جہاں آرمی چیف جنرل قمرجاوید باجوہ سے وائس ایڈمرل ڈیوڈ جانسٹن کی ملاقات ہوئی۔

اس ملاقات میں باہمی دلچسپی اور علاقائی سیکیورٹی کےامور پر بات چیت ہوئی، اس موقع پر آرمی چیف جنرل قمرجاوید باجوہ نے کہا کہ پاکستان آسٹریلیا کے جنگلات میں لگی آگ بجھانے میں ہر ممکن تعاون کیلئے تیار ہے۔

آسٹریلیا بش فائر: سرینا ولیمز نے فائر فائٹرز کیلئے لباس عطیہ کردیا

آرمی چیف جنرل قمرجاوید باجوہ اس سے پہلے آسٹریلین چیف آف ڈیفنس فورسز جنرل انگس جان کیمپبل کو جنگلات کی آگ بجھانے کیلئے تعاون کی پیشکش کر چکے ہیں۔

وائس ایڈمرل ڈیوڈ جانسٹن نے خطے میں امن و استحکام کیلئے پاک فوج کے کردار کی تعریف کی اور آسٹریلیا کیلئے نیک جذبات کے اظہار پر آرمی چیف کا شکریہ بھی ادا کیا۔

واضح رہے کہ اس سے قبل سعودی عرب نے آسٹریلیا کو جنگلاتی آگ بجھانے کے سلسلے میں تعاون کی پیشکش کی تھی۔

شاہ سلمان نے ٹیلیفونک رابطے کے دوران واضح کیا ہے کہ سعودی عرب ان دنوں آسٹریلیا کے جنگلات میں لگی آگ پر قابو پانے میں ہر ممکن امداد اور تعاون کے لئے تیار ہے۔

گفتگو کے دوران شاہ سلمان بن عبدالعزیز نے جنگلات میں لگنے والی آگ کے باعث جاں بحق ہونے والوں کے لواحقین، آسٹریلیا کے وزیراعظم اور عوام سے گہرے رنج و ملال کا اظہار کیا ہے۔

آسٹریلیا کے وزیراعظم نے اپنے ملک اور عوام سے متعلق پاکیزہ جذبات و احساسات کے اظہار پر شاہ سلمان اور سعودی عوام کے لیے قدرو منزلت اور ممنونیت کے جذبات پیش کیے۔