حکومت نے عوام کو مناسب نرخوں پر اشیائے ضروریہ کی فراہمی یقینی بنانے کیلئے یوٹیلٹی سٹورز کارپوریشن کو سات ارب روپے کا پیکیج دیا ہے۔

تفصیلات کے مطابق  اطلاعات و نشریات کے بارے میں معاون خصوصی ڈاکٹر فردوس عاشق اعوان نے اسلام آباد میں نیوز بریفنگ  دیتے ہوئیے کہا کہ عام صارف کی سہولت ،کمزور ،مستحق اورنادار طبقات کے لئے ریاست کے تحفظ کو یقینی بنانے کے لئے وزیراعظم نے یوٹیلٹی سٹورکاپوریشن کے زریعے عوام کو ریلیف دینے کے لئے پیکیج کا اعلان کیا ہے ۔

معاون خصوصی برائے اطلاعات نے کہا کہوزیراعظم عمران خان کے سات ارب ریلیف پیکیج کے تحت ملک بھر کے یوٹیلٹی سٹورز پر کل بدھ سے چینی، دالوں، چاول اور گھی سمیت دیگر اشیاءضروریہ پر 7 روپے سے 40 روپے تک کی سبسڈی دی جائے گی۔

فردوس عاشق اعوان نے یہ بھی کہا کہ  عمران خان کے ویژن کے تحت معاشرے کے نادار اور پسے ہوئے طبقوں کو ریلیف فراہم کرنا تحریک انصاف حکومت کا عزم ہےجبکہ وزیراعظم کا عہد ہے کہ جوں جوں مالی پوزیشن مستحکم ہوتی جائے گی اسکا ریلیف اور فائدہ پاکستان کے عوام کو منتقل ہوتا جائے گا۔

فردوس عاشق اعوان کا کہنا تھا کہ اس اقدام کا مقصد معاشرے کو ریاست مدینہ کے خطوط پر استوار کرنا ہے تاکہ مالیاتی مسائل کے شکار لوگوں کی مشکلات کم کی جاسکیں۔

 بلوچستان کی عوام کی زندگیوں میں بہتری لانا حکومت کی اولین ترجیح ہے،وزیر اعظم

معاون خصوصی برائے اطلاعات فردوس عاشق اعوان کا یہ بھی کہنا تھا کہ وزیراعظم کے عزم کا واضح اظہار ہے کہ یوٹیلٹی سٹورز کارپوریشن سبسڈی والی تمام اشیاءکی دستیابی کو یقینی بنائے گا جبکہ  سپلائی چین کے ساتھ ساتھ شفاف نظام کے تحت حق دار کو حق لوٹایا جائے گا اور ادارے کے اندر بھی خود احتسابی کو بھی یقینی بنایا جائے گا۔

اس موقع پر یوٹیلٹی سٹورز کارپوریشن کے چیئرمین ذوالقرنین علی خان نے گفتگو کرتے ہوئے کہا کہ نئے پیکیج کے تحت آٹا’ چینی’ گھی’ چاول اور دالیں عوام کو کم قیمتوں پر دستیاب ہوں گی۔

ذوالقرنین خان نے کہا کہ یوٹیلٹی سٹورز کارپوریشن کی تنظیم نو جدیدخطوط پر کی جارہی ہے لیکن کسی کو ملازمت سے نہیں نکالا گیا اور مہنگائی کی حالیہ لہر کا تعلق عالمی منڈی میں تیل کی قیمتوں میں اضافے سے ہے۔

کارپوریشن کے چیئرمین نے کہا کہ کارپوریشن اپنے نیٹ ورک کو موجودہ چار ہزار سے بڑھا کر دس ہزار سٹورز تک بڑھانے کا ارادہ رکھتی ہے، حکومت جلد راشن کارڈ متعارف کرائے گی جن میں یوٹیلٹی سٹورز کے آئوٹ لیٹس اہم کردار ادا کریں گے ۔