وزیراعظم عمران خان  نے کہا  ہے کہ ہمارے منشور کا بنیادی عنصر کرپشن کا خاتمہ ہے  جبکہ تر قیاتی کاموں کے حوالے سے کسی علاقے کو نظر انداز نہیں کیا جائے گا۔

تفصیلات کے مطابق وزیراعظم عمران خان کی  پنجاب سے منتخب تحریک انصاف کے قومی اسمبلی کے ارکان سے ملاقات ہوئی۔

ملاقات میں صوبے میں ڈویژن کی سطح پر سالانہ ترقیاتی پروگرام کے حوالے سے منتخب نمائندگان اور صوبائ حکومت کے درمیان مشاورت کے حوالے سے گفتگو کی گئی جبکہ اراکین نے اپنے متعلقہ حلقوں میں عوام کو درپیش سماجی و ترقیاتی  مسائل کے حل میں درپیش مشکلات سے آگاہ کیا۔

اس موقع پر وزیراعظم عمران خان نے صوبائ حکومت، خصوصی طور پر انتظامیہ اور منتخب نمائندگان کے مابین ایک مربوط اور موثر مکینزم کی اہمیت پر زور دیا اور اس ضمن میں صوبائ حکومت کو ہدایات جاری کی۔

وزیراعظم نے کہا کہ آپ لوگوں سے آج ملاقات کا مقصد آپ کے متعلقہ حلقوں میں عوام الناس کو درپیش مسائل اور ترقیاتی منصوبوں کی تکمیل کے حوالے سے مشکلات کا ادراک اور ان کے فوری حل کے لے ہدایات جاری کرنا ہے۔

عمران خان نے  اس موقع پر ہدایت کی کہ  ارکان اسمبلی اپنے حلقوں میں عوام سے قریبی رابطہ رکھیں اور ان کے مسائل کے ترجیحی بنیادوں پر حل کے لیے کوشاں رہیں۔

عمران خان کا کہنا تھا کہ ایک منظم مافیا معاشرے میں حکومت کے خلاف منفی تاثر کو فروغ دے رہا ہے ،یہ وہی عناصر ہیں جو گزشتہ دہائیوں سے اپنے مذموم مقاصد حاصل کرنے کے لیے عوام کو گمراہ کر رہا ہے ہیں اور  جان بوجھ کر ہر روز افراتفری کی باتیں کی جاتی ہیں تاکہ جو مثبت انتظامی تبدیلیاں ہم لے کر آ رہے ہیں ان کو ناکام بنایا جائے ۔

وزیراعظم عمران خان کل کراچی کا دورہ کریں گے

 وزیراعظم کا یہ بھی کہنا تھا کہ پنجاب کی تاریخ میں پہلی مرتبہ بڑے جرائم پیشہ عناصر کے خلاف اور قبضہ مافیا قانون کی گرفت میں آئے ہیں، جب ہم نے حکومت سنبھالی تو ملک کو تاریخی خسارے کا سامنا تھا جبکہ  روپے کی قدر مسلسل گر رہی تھی اور ملک قرضوں اور کرپشن کی وجہ سے  ڈوبا ہوا تھا لیکن الحمدللہ، آج صورتحال تبدیل ہو چکی ہے، روپے کی قدر میں توازن آگیا ہے۔

 عمران خان  نے کہا کہ ڈیووس میں جس طرح ہمیں پذیرائی ملی ہے اس کی ماضی میں نظیر نہیں ملتی ،ڈیووس میں دنیا کی بڑی سرمایہ کار کمپنیوں کے وفد شریک ہوتے ہیں اور  ان سب نے کہا کہ پاکستان میں سرمایہ کاری کے بے پناہ مواقع اور صلاحیت ہے۔

وزیراعظم عمران خان  نے مزید کہا کہ آج دنیا پاکستان کو سرمایہ کاری کے حوالے سے پرکشش ملک کے طور پر دیکھ رہی ہے  اور میں واضح کر دینا چاہتا ہوں کہ ہم ہرگز دباو میں نہیں آئیں گے ،ہمیشہ چیلنجز کا سامنا کیا ہے اور انشاءاللہ آئندہ بھی کریں گے ۔