پاکستان کی جانب سے ایف اے ٹی ایف کے سوالنامے کا تفصیلی جواب بھجوادیا گیا ہے۔

تفصیلات کے مطابق ذرائع کا کہنا ہے کہ ایف اے ٹی ایف کے سوالنامے کے جواب میں حکومت کی جانب سے 163 سوالات کے جواب دیئے گئے ہیں۔

فنانشل ایکشن ٹاسک فورس کے سوالنامے پر پاکستانی جواب 38 صفحات پر مشتمل ہے، تفصیلی جوابی رپورٹ میں فیٹف کے اٹھائے گئے 27 نکات کا احاطہ بھی کیا گیا ہے۔

رپورٹ میں اینٹی ٹیررفنانسنگ پرسزاؤں کی تفصیلات سمیت ایف اے ٹی ایف کی شرائط پرعمل سے متعلق تازہ پیشرفت سے آگاہ کیا گیا، رپورٹ کے مطابق میوچل لیگل اسسٹنٹ قانون میں ترامیم پر پیشرفت کی۔

ایف اے ٹی ایف کیلئے پاکستانی اقدامات پر مشتمل رپورٹ تیار کرلی گئی

ذرائع کے مطابق پارلیمنٹ کی قائمہ کمیٹی برائے خزانہ دیگر قوانین میں ترامیم کی منظوری دے چکی ہے، میوچل لیگل اسسٹنٹ ترمیمی بل، منی لانڈرنگ، ٹیرر فنانسنگ قوانین شامل ہیں۔

رپورٹ میں بتایا گیا کہ منی لانڈرنگ میں ملوث افراد کو سزا ایک سال،50 لاکھ جرمانہ کیا جائے گا، سعودی عرب میں منی لانڈرنگ کی 10 سال قید،50 لاکھ ریال سزا مقرر ہے، ہانگ کانگ میں منی انڈرنگ کی 5 لاکھ ڈالرکی سزا مقرر ہے۔

ایکشن پلان کے ایشیا پیسفک گروپ کا اجلاس رواں ماہ 21 جنوری سے بیجنگ میں ہوگا۔

ایف اے ٹی ایف ایکشن پلان کا جائزہ اجلاس آئندہ ماہ پیرس میں ہونا ہے، رپورٹ کی روشنی میں گرے لسٹ سے نام ہٹانے پر پیشرفت ہوسکے گی۔

واضح رہے کہ اس سے قبل ایف اے ٹی ایف کی جانب سے بھیجے گئے سوالنامے میں کالعدم تنظیموں سے جڑے افراد کے خلاف کارروائی کا مطالبہ کیا گیا ہے پاکستان کے پاس جواب جمع کرانے کے لئے آٹھ جنوری کی ڈیڈلائن تھی۔

ذرائع وزارت خزانہ کے مطابق فنانشل ایکشن ٹاسک فورس کی جانب سے موصول سوالنامے میں مطالبہ کیا گیا ہے کہ پاکستان کالعدم تنظیموں سےمنسلک افرادکوسزا دلوائے ساتھ ہی مدارس سےمتعلق کیےگئے قانونی اقدامات کی تفصیلات اور کالعدم تنظیموں کےخلاف درج مقدمات کی نقول بھی مانگی گئی تھیں۔

سوال نامہ پاکستان کی جانب سے تین دسمبر کوجمع کرائی گئی رپورٹ کےجواب میں بھیجا گیا ہے جس پر 8 جنوری تک جوابات جمع کرانا ہوں گے۔