برطانیہ کے ہائی کمشنر ڈاکٹر کرسچین ٹرنر نے موسمیاتی تبدیلی سے متعلق وزیراعظم کے مشیر ملک امین اسلم سے اسلام آباد میں ملاقات کی۔

تفصیلات کے مطابق برطانیہ کے ہائی کمشنر نےملاقات میں حکومت کے سرسبزاورصاف پاکستان پروگراموں میں موسمیاتی تبدیلی کی وزارت کے ساتھ مل کر کام کرنے میں دلچسپی ظاہر کی ۔

اس موقع پربرطانوی ہائی کمشنر نے گرین فنانشل سسٹمز، سرسبزاورصاف ستھرے ماحول کا فروغ،مسائل کے فطری حل اور ماحولیاتی تغیر سے نمٹنے کے لئے پاکستان کے اقدامات سمیت موسمیاتی تبدیلی کے چار شعبوں پربھی گفتگوکی۔

وزیراعظم کے مشیر ملک امین اسلم نے برطانوی ہائی کمشنر کو موسمیاتی تبدیلی کے اثرات کم کرنے کے حوالے سے حکومت کے پانچ اہم اقدامات کے بارے میں بتایا۔

ان اقدامات میں موسمیاتی تبدیلی کی وزارت کی طرف سے جاری صاف ستھرا اور سرسبز پاکستان پروگرام، کلین گرین پاکستان رسک انڈیکس، دس ارب درخت لگانے کا سونامی پروگرام، ریچارج پاکستان اور قدرتی ماحول کی بحالی کے فنڈ کا قیام شامل ہیں۔

برطانیہ کے ہائی کمشنر تھامس ڈریو کی شاہ محمود قریشی سے ملاقات

واضح رہے اس سو قبل پاکستان میں برطانیہ کے ہائی کمشنر تھامس ڈریو کی وزارت خارجہ میں وزیر خارجہ مخدوم شاہ محمود قریشی سے ملاقات ہوئی تھا۔

ملاقات میں مقبوضہ جموں و کشمیر میں جاری انسانی حقوق کی سنگین خلاف ورزیوں، برطانوی شاہی جوڑے کی دورہ ء پاکستان پر متوقع آمد و دیگر دو طرفہ باہمی دلچسپی کے امور پر تبادلہ خیال کیا گیا تھا ۔

اس موقع پر وزیر خارجہ مخدوم شاہ محمود قریشی کا کہنا تھا کہ مقبوضہ جموں و کشمیر میں بنیادی انسانی حقوق کی سنگین خلاف ورزیاں عروج پر ہیں، 5 اگست سے بھارت نے مقبوضہ جموں و کشمیر میں کرفیو لگا کر 80 لاکھ بے گناہ کشمیریوں کو محصور کر رکھا ہے۔

شاہ محمود قریشی کا یہ بھی کہنا تھا کہ برطانیہ سمیت عالمی برادری کو مقبوضہ کشمیر کے لاکھوں معصوم انسانوں کو بھارتی استبداد سے نجات دلانے اور بلاجواز کرفیو کے فل الفور خاتمے کیلئے موثر کردار ادا کرنا ہوگا۔