وزیراعظم عمران خان نے عالمی اقتصادی فورم کے موقع پر جرمن چانسلر انجیلا مرکل سمیت  کئی  رہنماؤں اور کاروباری شخصیات سے ملاقاتیں کی۔

تفصیلا کے مطابق ڈیووس میں عالمی اقتصادی فورم کے موقع پر وزیراعظم عمران خان اور جرمنی کی چانسلر انجیلا مرکل کے درمیان غیر رسمی ملاقات ہوئی ہے۔

دونوں کے درمیان ملاقات عالمی اقتصادی فورم کی سائیڈ لائن پر ہوئی۔

ملاقات میں جرمن چانسلر انجیلا مرکل نے وزیراعظم پاکستان عمران خان کو جرمنی کے دورے کی دعوت دی۔

دریں اثناء وزیراعظم عمران خان سے کے او سی ہولڈنگز کے چیف ایگزیکٹو لیونٹ کیکیرو رگلو نے عالمی اقتصادی فورم کے سالانہ اجلاس 2020ء کے موقع پر ملاقات کی۔

اس موقع پر وزیراعظم عمران خان نے پاکستان میں 1953ء سے کمپنی کے وجود اور طویل وابستگی کو سراہا۔

عمران خان نے کہا کہ 1960ء کے بعد موجودہ حکومت نے پہلی بار صنعتی ترقی کو اپنی ترجیحات میں شامل کیا ہے اور ہم ہنرمندی کے فروغ، ٹیکنالوجی کی منتقلی اور اقتصادی ترقی کے خواہاں ہیں۔

وزیراعظم نے کے او سی کو توانائی، سیاحت اور میزبانی کے شعبوں میں سرمایہ کاری پر غور کرنے کی دعوت دی۔

وزیراعظم کے معاون خصوصی سیّد ذوالفقار عباس بخاری، سرمایہ کاری کیلئے سفیر عمومی علی جہانگیر صدیقی، گورنر سٹیٹ بینک رضا باقر اور جنیوا میں اقوام متحدہ کیلئے پاکستان کے مستقل مندوب خلیل ہاشمی بھی اس موقع پر موجود تھے۔

ہمارا مقصد معیشیت میں بہتری لانا ہے، وزیراعظم

یاد رہے کہ کے او سی ہولڈنگز ترکی کی بڑی کمپنی ہے جو توانائی، آٹوموٹیو، فنانس، سیاحت، ریٹیل، تعمیرات، شپنگ، دفاع، انفارمیشن ٹیکنالوجی اور خوراک کے شعبوں میں اپنی مصنوعات کیلئے معروف ہے۔

علاوہ ازیں وزیراعظم عمران خان سے ڈیووس میں عالمی اقتصادی فورم کے سالانہ اجلاس کے موقع پر سمیٹومو کارپوریشن کے صدر و چیف ایگزیکٹو آفیسر مسایوکی ہائیوڈو نے  بھی ملاقات کی۔

 اس موقع پر وزیراعظم کے مشیر برائے تجارت عبدالرزاق دائود اور سرمایہ کاری سے متعلق عمومی سفیر علی جہانگیر صدیقی اور یو این جنیوا میں پاکستان کے مستقل مندوب خلیل ہاشمی بھی موجود تھے۔