صوبائی وزیر اطلاعات فیاض الحسن چوہان نے کہا ہے کہ کشمیر پاکستان کی شہ رگ ہے اور مقبوضہ کشمیر کا پاکستان کے ساتھ الحاق ہو کر رہے گا۔

تفصیلات کے مطابق صوبہ پنجاب کے وزیر اطلاعات فیاض الحسن چوہان نے یکجہتی کشمیر تقریب سے خطاب کرتے ہوئے کہا کہ ہمارا عزم ہے کشمیر ہمارا ہے اور سارے کا سارا ہمارا ہے۔

 اپنے بیان میں فیاض الحسن چوہان نے کہا کہ  عمران خان نے وزیر اعظم بنتے ہی ہر فورم پر مسئلہ کشمیر کے حل کی بات کی، کشمیریوں کی سیاسی، سفارتی اور اخلاقی حمایت جاری رہے گی۔

صوبائی وزیر اطلاعات نے یہ بھی کہا کہ  عمران خان نے دنیا بھر میں کشمیری عوام کے لیے آواز اٹھا کر اپنا حق ادا کیا، کشمیری عوام پاکستان کے ساتھ ملنا چاہتے ہیں اور ہم کشمیریوں کی اس طرح حمایت کریں گے کہ پوری دنیا جانے گی۔

فیاض الحسن چوہان کا کہنا تھا کہ وزیر اعظم عمران خان اس ملک کے ہیرو ہیں لیکن کچھ  ایسی پارٹیاں بھی ہیں جو وزیر اعظم کی جدوجہد ماننے کو تیار نہیں، حقیقت تو یہ ہے پاکستان میں مودی کو اپنے گھروں میں بلایا گیا۔

صوبائی وزیر اطلاعات فیاض الحسن چوہان کا مزید کہنا تھا کہ مودی نے ظالموں کو پال رکھا ہے، ۔ مودی کو غلط فہمی ہے کہ عمران خان کشمیر کا مقدمہ لڑنے سے رکے گا تو یہ ان کی بھول ہے کہ پاکستان کے عوام اور وزیر اعظم کو ڈرا لیں گے کیونکہ مقبوضہ کشمیر کا پاکستان کے ساتھ الحاق ہو کر رہے گا۔

شہباز شریف اپنی لوٹ مار کا غصہ عمران خان پر مت نکالیں، فیاض الحسن چوہان

یاد رہے کہ مقبوضہ کشمیر میں بدترین لاک ڈاؤن جاری ہے ، کشمیری عوام تین ماہ سے زائد عرصے سے قیدیوں کی زندگی گزارنے پر مجبور ہیں۔

وادی مقبوضہ کشمیر کی سڑکیں سنسان، دکانیں بند، کاروباری مراکز پر تالے پڑے ہیں، مسلسل کرفیو کے باعث کاروبار زندگی درہم برہم، گلیوں اورسڑکوں پر بھارتی فوج کا گشت، گھروں کے باہر بھی فوجی تعینات، گھروں میں محصورافراد کو اپنے رشتہ داروں کے جنازے تک پڑھنے کی بھی اجازت نہیں،اسکول بند ہیں، اسپتالوں میں ڈاکٹرز کا پہنچنا دشوار ہوگیا، طبی امداد نہ ملنے سے مریضوں کی زندگیاں بھی داؤ پر لگ گئیں، ہر روز سات سے آٹھ افراد کو دل کا دورہ پڑرہا ہے لیکن علاج معالجے کی کوئی سہولت میسرنہیں۔