حریت رہنما یاسین ملک کی اہلیہ مشعال ملک نے کہا ہے کہ نریندر مودی حکومت مسلم  دشمن پالیسی پر عمل پیراہے ۔

تفصیلات کے مطابق حریت رہنما یاسین ملک کی اہلیہ مشعال ملک نے اپنے بیان میں کہا  کہ مقبوضہ کشمیر کے بعد نریندر مودی نے بھارت میں بھی مسلمانوں کا جینا مشکل کر دیا۔

اپنے بیان میں حریت رہنما یاسین ملک کی اہلیہ نے کہا کہ بھارت میں چونتیس سے زائد مسلمانوں کے قتل پر عالمی برادری کی خاموشی افسوسناک ہے۔

 سین ملک کی اہلیہ نے یہ بھی کہا کہ بھارت میں مساجد کو شہید کیا جا رہا ہے اور ہندوستان میں نہ صرف اقلیتوں کے ساتھ بدترین سلوک کیا جا رہا ہے بلکہ اقلیتوں کے خلاف باقاعدہ قانون سازی بھی ہو رہی ہے۔

 مشعال ملک کا کہنا تھا کہ نریندر مودی حکومت آر ایس ایس کے ایجنڈے پر عمل پیرا ہے اور آر ایس ایس ایک دہشت گرد تنظیم ہے۔

حریت رہنما یاسین ملک کی اہلیہ مشعال ملک کا مزید کہنا تھا کہ نریندر مودی حکومت نے آر ایس ایس کے غنڈے کشمیر میں تعینات کر رکھے ہیں اور پیرا ملٹری فورسز کے ساتھ آر ایس ایس کے غنڈے کشمیر میں بھی کشمیریوں کا قتل عام کررہے ہیں۔

نئی دہلی میں فسادات، ہلاکتوں کی تعداد 32 ہوگئی

دوسری جانب بھارتی  دارالحکومت نئی دہلی میں متنازع شہریت کے قانون کے خلاف احتجاج کے دوران ہونے والے فسادات میں ہلاکتوں کی تعداد 32ہوگئی ہے۔

بھارتی میڈیا کے مطابق بھارتی  دارالحکومت نئی دہلی میں فسادات کے باعث ہلاکتوں کی تعداد 32 ہوگئی ۔پولیس کی جانب سے 106 افراد کو گرفتار  بھی کیا گیا ہے جبکہ 18 افراد کے خلاف ایف آئی آر درج کی گئی ہے ۔

مقامی حکام کا کہنا ہے کہ زخمیوں میں سے متعدد کی حالت نازک ہے اور ہلاکتوں کی تعداد میں اضافہ ہو سکتا ہے۔

نئی دہلی کی سڑکوں پر پولیس کی سرپرستی میں انتہا پسند ہندوؤں کا راج ہے۔ مسلح جتھوں نے مسلمانوں کی دکانیں اور گھر نذر آتش کردیے جبکہ متعدد مساجد کو  بھی شہید کردیا  گیا ہے۔