وزیراعظم عمران خان نے کہا کہ بے سہارا اور محروم بچے ریاست کی ذمہ داری ہیں۔

تفصیلات کے مطابق وزیر اعظم عمران خان سے سیکرٹری سوشل ویلفیئر خیبر پختونخوا محمد ادریس اور چیئرپرسن چائلڈ پروٹیکشن بیورو پنجاب سارہ احمد نے ملاقات کی جس میں بچوں کے حقوق کے تحفظ کے حوالے سے کیے جانے والے اقدامات پر تفصیلی بات چیت کی گئی ۔

ملاقات میں چیئرپرسن چائلڈ پروٹیکشن بیورو پنجاب سارہ احمد نے وزیراعظم کو بچوں کے حقوق کےتحفظ کے حوالے سے کیے گئے اقدامات پر تفصیلی بریفنگ دی۔

اس موقع پر وزیراعظم عمران خان نے چیرپرسن سارہ احمد کے پچھلے ایک سال کے دوران کیے گئے اقدامات کو سراہتے ہوئے ہدایت کی کہ بے آسرا اور محرومیوں کا شکار بچوں کے تحفظ اور انکو تعلیم و صحت کی بہترین سہولیات کی فراہمی پر بھرپور توجہ دی جائے۔

وزیرِاعظم نے ہدایت کی کہ بچوں کو ہر قسم کے استحصال سے بچانے اور ان کو محفوظ ماحول فراہم کرنے کے حوالے سے ہر ممکنہ اقدام اٹھایا جائے۔

عمران خان نے کہا کہ بچے ہمارا مستقبل ہیں، مستقبل کے معماروں پر سرمایہ کاری اور ان کی بہتر نشوونما سے ہی ملک و قوم کی پائیدارترقی ممکن ہو گی۔

وزیر اعظم عمران خان  نے مزید کہا کہ بچوں کی تعلیم، صحت اور دیگر سہولیات کے ساتھ ساتھ محفوظ ماحول فراہم کرنا ریاست کی اولین ترجیح ہے۔

کوکا کولا کا پاکستان میں مزید سرمایہ کاری کی خواہش کا اظہار

وزیراعظم سے ملاقات  کے دوران سیکرٹری سوشل ویلفیئر خیبر پختونخواہ محمد ادریس بھی موجود تھے۔

واضح رہے اس سے قبل بھی وزیراعظم عمران خان سے کوکا کولا کے جنرل مینجر کی ملاقات ہوئی تھی جس میں کوکا کولا کمپنی کے جنرل مینیجر نے وزیراعظم کو پاکستان میں سرمایہ کاری پر بریفنگ دی تھی۔

ملاقات میں  وزیراعظم نے کوکا کولا کی پاکستان میں خدمات کو سراہا اور کہا تھا  کہ کوکا کولا کو بزنس توسیع میں معاونت فراہم کریں گے۔

اس موقع پر وزیراعظم کا کہنا تھا کہ پاکستان میں سرمایہ کاری کے بیشمار مواقع ہیں اور ترک صدر کا دورہ پاکستان دونوں ممالک کے درمیان دو طرفہ تعلقات کو نئی بلندیوں پر لے جائے گا۔