وزیر خارجہ شاہ محمود قریشی کا کہنا ہے کہ افغانستان میں دائمی امن  کے لیے پاکستان اپنی کوششیں جاری رکھے گا ۔

تفصیلات کے مطابق وزیر خارجہ شاہ محمود قریشی سے دوحہ میں جاری افغان امن عمل کانفرنس کے موقع پر امریکی نمائندہ خصوصی زلمے خلیل زاد  نے  ملاقات کی ۔

ملاقات میں زلمے خلیل زاد نے امریکہ اور طالبان کے درمیان امن معاہدے کی تازہ ترین صورتحال سے وزیر خارجہ کو آ گاہ کیا۔

اس موقع پر وزیر خارجہ  شاہ محمود قریشی نے کہا کہ آ ج کے امن معاہدے کے بعد پاکستان انٹرا افغان مذاکرات کی امید رکھتا ہے۔ افغانستان کو تعمیر نو اور بحالی کے لیے عالمی برادری کی مدد کی ضرورت ہو گی۔

افغان طالبان اور امریکہ کے درمیان امن معاہدے پر دستخط آج ہوں گے

شاہ محمود قریشی  کا کہنا تھا کہ  افغانستان میں دائمی امن و استحکام کے لیے پاکستان اپنی کوششیں جاری رکھے گا۔

دوسری جانب  وزیر خارجہ سے انڈونیشیا کے وزیرِ خارجہ رتنو مارسودی  نے بھی ملاقات کی۔

دوران ملاقات دو طرفہ تعلقات، افغان امن عمل اور ہندوستان میں جاری پر تشدد واقعات سمیت، خطے میں امن و امان کی مجموعی صورتحال پر تبادلہ خیال کیا گیا۔

اس موقع پر وزیر خارجہ نے کہا کہ پاکستان انڈونیشیا کے ساتھ اپنے دو طرفہ تعلقات کو انتہائی قدر کی نگاہ سے دیکھتا ہے ۔

انڈونیشیا  کے وزیر خارجہ نے افغان امن عمل میں پاکستان کے مصالحتی کردار کو سراہتے ہوئے اس ضمن میں انڈونیشیا کی طرف سے پرزور تعاون کا یقین دلایا۔