قومی نشریاتی ادارے ’ریڈیو پاکستان‘ کی جانب سے کشمیر سے یکجہتی کے اظہار کے لئے دو نغمے جاری کئے گئے ہیں۔

تفصیلات کے مطابق آج شب ریڈیو پاکستان کی جانب سے کشمیر ڈے یعنی 5 فروری کی مناسبت سے دو نغمے ”جنت نہ جلاؤ” اور ”اے خدا” جاری کئے گئے ہیں۔

ان نغموں کو باقاعدہ طور پر جاری کرنے کے لئے ایک خصوصی تقریب کا انعقاد کیا گیا جس میں وزیراعظم عمران خان کی معاون خصوصی ڈاکٹر فردوس عاشق اعوان نے بطور مہمان خصوصی شرکت کی۔

تقریب میں بطور مہمان خصوصی ڈاکٹر فردوس نے خطاب کرتے ہوئے کہا کہ ریڈیو پاکستان ملک کی نظریاتی سرحدوں کے دفاع کے لئے کوشاں ہے اور اس سلسلے میں اس کا کردار ہمیشہ قابل ستائش رہا ہے۔

انہوں نے کہا کہ ریڈیو پاکستان نے مشکل کی ہر گھڑی میں اہم کردار ادا کیاہے اور امن اور جنگ کی صورتحال میں قوم کی حمایت کی ہے۔

سندھ میں کشمیر ڈے پر عام تعطیل کا اعلان

انہوں نے ریڈیو پاکستان کی جانب سے یوم یکجہتی کشمیر کے موقع پر کشمیریوں سے اظہار یکجہتی کیلئے دو نغمے جاری کرنے کو سراہتے ہوئے کہا کہ ان نغموں کی بدولت دنیا کو مقبوضہ کشمیر میں بھارتی مظالم کی اصل صورتحال کا ادراک ہوگا۔

انہوں نے کہا کہ ان نغموں سے کشمیریوں کی تحریک آزادی کی حمایت میں پاکستان کے بائیس کروڑ عوام کے جذبات کی ترجمانی بھی ہوتی ہے۔

ڈاکٹر فردوس عاشق اعوان نے کہاکہ حکومت نے موثر سفارتکاری کے ذریعے کشمیر کے اہم مسئلے کو کامیابی سے بین الاقوامی سطح پر اجاگر کیا ہے۔انہوں نے کہا کہ کشمیر پاکستان کی شہ رگ ہے اور ہم کشمیری بھائیوں کی جدوجہد آزادی کی کامیابی تک ان کی سیاسی’ اخلاقی اور سفارتی حمایت جاری رکھیں گے۔

انہوں نے کہا کہ ریڈیو پاکستان ہماری سیاسی اور سماجی اقدار کی علامت ہے’ انہوں نے کہا کہ پاکستان نے نشریات کی دنیا میں نئے رحجانات متعار ف کرائے ہیں۔