سی پیک اتھارٹی کے چیئرمین جنرل (ر) عاصم سلیم باجوہ سے پاکستان میں چین کے سفیر یائو جنگ نے ملاقات کی ہے۔

ملاقات کے دوران نول کرونا وائرس،آئندہ سی پیک منصوبوں اور موجودہ صورتحال پر تفصیلی تبادلہ خیال کیا گیا۔

ملاقات میں اس عزم کا اعادہ کیا گیا ہے کہ چین پاکستان اقتصادی راہداری (سی پیک) منصوبے دونوں حکومتوں کے درمیان بڑے باہمی معاہدے ہیں  جبکہ کرونا وائرس سے منصوبوں پر پیشرفت متاثر نہیں ہو گی، سی پیک سے پاکستان میں خوشحالی آئے گی۔

واضح رہے اس سے قبل وفاقی حکومت  نے لیفٹیننٹ جنرل ریٹائرڈ عاصم سلیم باجوہ کو سی پیک اتھارٹی  کا سربراہ بنانے کا فیصلہ کیا تھا اور اس کی سمری وزیراعظم کو ارسال کی تھی۔

جنرل(ر) عاصم سلیم باجوہ سی پیک کے چیئرمین مقرر، نوٹیفکیشن جاری

 ریٹائرڈ لیفٹیننٹ جنرل عاصم سلیم باجوہ سابق کور کمانڈ کو پاک چین اقتصادی راہداری سی پیک کا سربراہ بنانے کا فیصلہ 23 نومبر کو ہونے والے وفاقی کابینہ  کے اجلاس میں کیا گیا تھا۔

 سی پیک اتھارٹی کا سربراہ بنانے کی سمری منظوری کے لیے وزیراعظم کو بھجوا دی گئی تھی۔

یاد رہے کہ  لیفٹیننٹ جنرل ریٹائرڈ عاصم سلیم باجوہ سدرن کور کی کمانڈ سے ریٹائر ہوئے تھے، اس سے قبل وہ ڈی جی آئی ایس پی آر کے عہدے پر بھی سنہ 2012 سے سنہ 2016 تک لیے فائز رہے تھے ، ان کے بعد موجودہ ڈی جی آئی ایس پی آر میجر جنرل آصف غفور نے اس عہدے کا چارج لیا۔

ریٹائرمنٹ سے قبل کمانڈر سدرن کمانڈ لیفٹیننٹ جنرل عاصم سلیم باجوہ نے کیڈٹ کالج کوہلو کا دورہ کیا تھا جہاں پرنسپل کیڈٹ کالج کوہلو کرنل رضا محمد تنولی نے ان کا استقبال کیا تھا اور کالج کے حوالے سے کئے گئے اقدامات کے بارے میں کمانڈر سدرن کمانڈ کو تفصیلی بریفنگ دی تھی۔