چیف آف دی نیول اسٹاف ایڈمرل ظفر محمود عباسی سے اسلام آباد چیمبر آف کامرس اینڈ انڈسٹری کے سینئر ممبران پر مشتمل وفد نے ملاقات کی۔

ترجمان پاک بحریہ کے مطابق اسلام آباد چیمبر آف کامرس اینڈ انڈسٹری کے سینئر ممبران پر مشتمل وفد نے نیول ہیڈکوارٹرز اسلام آباد کا دورہ کیا اور پاک بحریہ کے سربراہ سے اہم ملاقات کی۔

ملاقات میں  میری ٹائم سیکٹر میں معاشی سرگرمیوں کے فروغ کے لیے باہمی تعاون پر تبادلہ خیال کیا گیا جبکہ چیف آف دی نیول اسٹاف ایڈمرل نے اسلام آباد چیمبر آف کامرس اینڈ انڈسٹری کے وفد کا نیول ہیڈ کوارٹر آنے پر شکریہ ادا کیا۔

نیول ہیڈ کوارٹرز میں وفد کو اہم بریفنگ بھی دی گئی جس میں باہمی دلچسپی کے شعبوں میں مقامی سطح پر دفاعی صنعت کو مزید بڑھانے کی ضرورت کو اجاگر کیا گیا۔

صدر اسلام آباد چیمبر آف کامرس نے تاجر برادری کی جانب سے مکمل تعاون کا یقین دلایا۔

وفد کے سربراہ نے بحری تجارتی راہداریوں کے تحفظ کے لیے پاک بحریہ کے کردار کی تعریف کی۔ دورے کا مقصد تاجر برادری اور بحری شعبے کے مابین ہم آہنگی کو فروغ دینا ہے۔

پاک چین مشقوں کا انعقاد دونوں مملک کے عزم کو مضبوط بنائے گا، ایڈمرل ظفر محمود عباسی

واضح رہے اس سے قبل ترجمان پاک بحریہ نے کہا تھا کہ نیول چیف نے مشق سی گارڈینز 2020 کے دوران کراچی میں چینی بحری جہاز کا دورہ کیا۔

پاک بحریہ کے ترجمان کے مطابق چینی بحری جہاز  ین چواں آمد پر چیف آف دی نیول اسٹاف کو گارڈ آف آنر پیش کیا گیا، سربراہ پاک بحریہ نے چینی بحریہ کی جنوبی تھیٹر کمانڈ کے ڈپٹی کمانڈر وائس ایڈمرل ڈانگ ژن سے ملاقات کی اور مختلف امور پر تبادلہ خیال کیا گیا تھا۔

نیول چیف کا کہنا تھا کہ مشق سی گارڈینز 2020 دونوں ممالک کے دیرینہ تعلقات اور باہمی اعتماد کی مظہر ہے۔

چیف آف دی نیول اسٹاف ایڈمرل ظفر محمود عباسی کا مزید کہنا تھا کہ مشترکہ مشق کا انعقاد خطے کے امن  و استحکام کے لئے پاکستان اور چین کے عزم کو مزید مضبوط بنائے گا۔