مشیر خزانہ عبدالحفیظ شیخ سے وزیر سائنس و ٹیکنالوجی فواد چوہدری کی ملاقات ہوئی ، جس میں پاکستان میں ریسرچ اینڈ ڈیولپمنٹ کے معاملات پر تبادلہ خیال کیا گیا۔

مشیر خزانہ سے ملاقات میں وزیر سائنس و ٹیکنالوجی نے کہا کہ کاروباری برادری ، مختلف یونیورسٹیوں اور تحقیقی اداروں کے مابین رابطے قائم کئے جائیں گے جبکہ اس مقصد کیلئے 1.3 ارب ڈالر کی مالیت کا کیمیکل برآمد کیا جائے گا جو مختلف صنعتی مقاصد کے لئے استعمال ہونگے۔

فواد چوہدری نے یہ بھی کہا کہ کیمیکلز اور بائیو ٹکنالوجی میں تحقیق کو فروغ دینے کے لئے خصوصی اقتصادی زون قائم کئے جائیں گے اور اس شعبے میں تحقیق اور ترقی سے مقامی پیداوار کے معیار کو فروغ ملے گا۔

وزیر سائنس و ٹیکنالوجی فواد چوہدری نے مزید کہا کہ برآمدات کے ذریعہ زرمبادلہ لانے کے بھی امکانات ہیں اور اس ضمن میں  ایک پائلٹ پروجیکٹ جلد شروع کیا جائے گا۔

وفاقی وزیر فواد چوہدری کی شرارتیں

اس موقع پر مشیر خزانہ عبدالحفیظ شیخ نے برآمدات کے ذریعہ زرمبادلہ لانے کے پیش کردہ امکانات کی تعریف کرتے ہوئے کہا کہ برآمدات کے فروغ اور منصوبوں کو فروغ دینے کے لئے جدید خیالات لانے کی ضرورت ہے۔

مشیر خزانہ عبدالحفیظ شیخ  نے مزید کہا کہ وزارت سائنس و ٹیکنالوجی کو ہر ممکن رابطہ کاری اور سہولت کی یقین دہانی کراتے ہیں جبکہ وزارت سائنس و ٹیکنالوجی تجارتی اطلاق سے تحقیق میں سرمایہ کاری کو فروغ دینے میں کردار ادا کررہی ہے۔