اسپیکر قومی اسمبلی اسد قیصر نے کہا ہے کہ کشمیر پاکستان کی شہہ رگ ہے اور پاکستان کبھی اس سے غافل نہیں ہو سکتا۔

تفصیلات کے مطابق اسپیکر قومی اسمبلی اسد قیصر سے آزاد جموں کشمیر  کے صدر سردار مسعود خان کی پارلیمنٹ ہاوس میں ملاقات ہوئی۔

ملاقات میں مقبوضہ کشمیر کی موجودہ صورت حال پر تبادلہ خیال کیا گیا جبکہ صدر آزاد کشمیر نے  پارلیمانی سفارتکاری کے ذریعے مسئلہ کشمیر کو علاقائی و عالمی سطح پر اُجاگر پر  اسپیکر قومی اسمبلی کو خراج تحسین پیش کیا۔

اسپیکر قومی اسمبلی نے کہا کہ پاکستانی عوام اور حکومت کشمیری عوام اور کشمیر میں ہونے والے ظلم و بربریت کی شدید مذمت کرتے ہوئے کہا کہ دنیا مقبوضہ کشمیر میں انسانی حقوق کی پامالیوں اور کشمیری عوام کے قتلِ عام کا نوٹس لے

اسد قیصر نے یہ بھی کہا کہ پاکستان کاپارلیمان کشمیری عوام کے  حقِ خود ارادیت اور جدوجہد آزادی کی مکمل حمایت کرتاہے ، قومی اسمبلی کے رواں اجلاس میں  دو دن کی کاروائی یوم یکجہتی کشمیر پر سیر حاصل بحث کے لیے مختص کیا گیا۔

اسپیکر قومی اسمبلی اسد قیصر نے مزید کہا کہ بھارت مسئلہ کشمیر سے توجہ ہٹانے کے لیے اوچھے ہتھکنڈے استعمال کر رہا ہے  جبکہ مسئلہ کشمیر کے حل کے بغیر خطے میں امن کا قیام ممکن نہیں اس لئے مسئلہ کشمیر اقوام متحدہ کی قراردادوں کی روشنی میں حل کیا جائے۔

اس موقع پر آزاد جموں کشمیر  کے صدر  نے کہا کہ آزاد کشمیر کی عوام پوری طرح مقبوضہ وادی کی عوام کے ساتھ  کھڑی ہے جبکہ کشمیر کی عوام کی منزل پاکستان  ہے اور پاکستان ہی رہے گی۔

آزاد جموں کشمیر  کے صدر نے کہا کہ کشمیری عوام کل بھی پاکستان کے ساتھ کھڑے تھے اور آج بھی پاکستان کے ساتھ کھڑے ہیں جبکہ ملک کی سالمیت اور بقا کے لیے پوری قوم متحد ہے اور ہر جارحیت کا بھرپور جواب دینے  کی صلاحیت رکھتی ہے۔

سردار مسعود خان نے یہ بھی کہا کہ  مقبوضہ کشمیر کی سنگین صورتحال پر  عالمی پارلیمانوں نے  بھرپور  انداز میں آواز اُٹھائی ہے، موجودہ حکومت نے کشمیر  میں بھارتی افواج کی طرف سے انسانی حقوق کی  خلاف ورزیوں کو بھرپور انداز میں عالمی سطح پر اُجاگر کیا ہے۔

آزاد جموں کشمیر  کے صدر سردار مسعود خان  نے مزید کہا کہ بھارت اقوام متحدہ کی قرارداد کے مطابق مسئلہ  کشمیر حل کرے اور وہاں پر جاری نہتے کشمیریوں پر ظلم و بربریت فوری بند کرے جبکہ پاکستان  کی طرف سے  مقبوضہ کشمیر کی عوام کے ساتھ اظہارِ یکجہتی اور مسئلہ کشمیر کے پُر امن حل کے لیے کاوشیں قابلِ ستائش ہیں۔

ملاقات میں وزیر اعلثی گلگت بلتستان حافظ حفیظ الرحمن، گورنر گلگت بلتستان راجہ جلال حسین مقپون، اسپیکر آزاد کشمیر شاہ غلام قادر، اسپیکر گلگت بلتستان فدا حسین نو شاد کے اعلاوہ ڈپٹی اسپیکر آزاد کشمیر اور گلگت بلتستان بھی موجودہ تھے۔