وزیر اعظم عمران خان نے کہا کہ اس وقت ہمارا مقابلہ مافیا اور مہنگائی سے ہے جو و ہر شعبے میں تبدیلی  کی راہ میں رکاوٹ بننے کی کوشش کر رہا ہے ۔

تفصیلات کے مطابق وزیر اعظم عمران خان سے گوجرانوالا سے پاکستان تحریک انصاف کے ٹکٹ ہولڈرز نے بدھ کو یہاں وزیر اعظم آفس میں ملاقات کی۔

ملاقات میں ملک کی مجموعی صورتحال، گوجرانوالا ضلع سے متعلق عوامی مسائل اور ترقیاتی ضرورتوں کے حوالے سے امور زیر بحث لائے گئے۔

وزیرِ اعظم عمران خان نے ٹکٹ ہولڈرز سے بات چیت کرتے ہوئے کہا کہ کرپشن اور مافیا زسے تنگ عوام پاکستان تحریک انصاف کو اپنا نجات دہندہ سمجھتی ہے۔

 عمران خان نے کہا کہ پاکستان تحریک انصاف نے مشکل ترین حالات میں حکومت کی باگ ڈور سنبھالی جبکہ ہمارا مقابلہ مافیا سے ہے جو ہر شعبے میں تبدیلی اور عوام کی بہتری کی راہ میں رکاوٹ بننے کی کوشش کر رہا ہے۔

وزیرِ اعظم نے کہا کہ مشکل حالات کے باوجود حکومت عوام کو ریلیف فراہم کرنے کی بھرپور کوشش کر رہی ہے، انشا اللہ حکومتی کوششوں کے نتیجے میں عوام کو خاطر خواہ ریلیف میسر آئے گا۔

بے سہارا اور محروم بچے ریاست کی ذمہ داری ہیں، وزیراعظم

وفد نے عمران خان کو اپنے اپنے حلقوں کی عوام کو درپیش مسائل اور علاقے کی ترقیاتی ضرورتوں سے آگاہ کیا جبکہ مہنگائی کے خلاف حکومتی کوششوں پر بھرپور اعتماد کا اظہار کیا۔

اس موقع پر وزیر اعظم عمران خان نے وفد کو یقین دلایا کہ علاقے کی ترقیاتی ضرورتوں سے متعلق پیش کی جانے والی تجاویز پر غور کیا جائے گا۔

عمران خان  سے ہونے والی ملاقات میں محمد احمد چٹھہ ( این اے 79)، میاں طارق (این اے 80) چوہدری صدیق مہر (این اے 81) علی اشرف مغل (این اے 82)، رانا نذیر ( این اے 83) اور رانا بلال اعجاز (این اے 84) شامل تھے۔