صوبائی ڈیزاسٹر مینجمنٹ اتھارٹی کے ڈی جی عمران زرکون نے کہا ہے کہ پاکستان نے ایران کے ساتھ تفتان پر واقع اپنی سرحد عارضی طور پر بند کردی ہے۔

تفصیلات کے مطا بق صوبائی ڈیزاسٹر مینجمنٹ اتھارٹی کے ڈی جی عمران زرکون نے میڈیا سے گفتگو کرتے ہوئے کہا کہ ایران میں کورونا وائرس کا پھیلاؤ اور اس کے باعث اموات کے بعد تفتان کے قریب پاک ایران بارڈر پر راہداری گیٹ اور مشترکہ منڈیوں کو بند جبکہ تجارتی اور سفری سرگرمیاں معطل کردی گئی ہیں۔

 حکام نے  یہ بھی کہا کہ تفتان میں احتیاطی و حفاظتی اقدامات کئے جارہے ہیں جہاں سو بستروں پر مشتمل خیمہ ہسپتال قائم کیا جارہا ہے تاکہ پاک ایران سرحد پر کسی بھی ہنگامی صورتحال سے نمٹا جاسکے۔

صوبائی ڈیزاسٹر مینجمنٹ اتھارٹی کے ڈی جی عمران زرکون نے  مزید کہا کہ پاک ایران سرحد پر مکمل اسکریننگ کے بعد ہی آمدورفت ممکن ہو سکے گی جبکہ یومیہ سیکڑوں افراد تفتان بارڈر سے آتے جاتے ہیں، ایران سے آنے والوں کو آبزرویشن میں رکھا جائے گا ۔

کرونا وائرس سے بچاؤ کیلئے اقدامات کو یقینی بنا رہے ہیں، ڈاکٹر ظفر مرزا

واضح رہے کہ ایران میں گذشتہ بدھ کو کرونا وائرس کے مریضوں کی پہلی مرتبہ اطلاع سامنے آئی تھی اور تہران کے جنوب میں واقع اہل تشیع کے لیے متبرک شہر قُم میں حکام نے دو ضعیف العمر افراد کی اس وائرس سے موت کی تصدیق کی تھی۔

حکام کا کہنا تھا  کہ چین سے آنے والے بعض مسافروں سے اس شہر میں کرونا وائرس پھیلا ہے اور ایرانی حکومت نے کرونا وائرس کو پھیلنے سے روکنے کے لیے ملک کے چودہ صوبوں میں تعلیمی اداروں کو ایک ہفتے تک بند رکھنے کا اعلان کیا ہے۔قُم شہر میں اس فیصلے پر آج اتوار سے عمل درآمد کیا جارہا ہے۔

یاد رہے کہ چین  سے پھیلنے والا مہلک کرونا وائرس ایران میں بھی وبائی شکل اختیار کررہا ہے اور اس سے ہلاکتوں کی تعداد اٹھارہ ہوگئی ہے۔