بھارتی فوج کی  لائن آف کنٹرول (ایل او سی ) پر اشتعال انگیزی کا سلسلہ جاری ہے، بھارتی فوج کی فائرنگ  سے بچوں اور خواتین  سمیت 10 افراد زخمی ہوگئے۔

پاک فوج کے شعبہ تعلقات عامہ (آئی ایس پی آر) کے مطابق  بھارتی فوج نے  جندروٹ اورنکیال سیکٹروں پر   گولہ باری کی اوربھاری ہتھیاروں  کا استعمال کیا ۔

آئی ایس پی آر کے مطابق بھارتی گولہ باری اور فائرنگ کے نتیجے میں 2بچوں اور 2 خواتین سمیت 10افراد زخمی ہوگئے ،زخمیوں  کو علاج کے لیے قریبی طبی مرکز منتقل کردیا گیا ہے۔

پاک فوج  نے بھارتی اشتعال انگیزی کے خلاف بھرپور جوابی کارروائی کی جس میں ایک بھارتی فوجی ہلاک جبکہ میجر سمیت 3 اہلکار زخمی ہوئے۔

واضح رہے کہ بھارتی فوج کی جانب سے لائن آف کنٹرول کی خلاف ورزیوں کا سلسلہ مسلسل جاری ہے۔

دو روز قبل  بھی بھارتی فوج نے سیز فائر معاہدے کی خلاف  ورزی کرتے ہوئے میر پور آزاد کشمیر ایل او سی کے چری کوٹ سیکٹر پر شہری آبادی کو نشانہ بنایا تھا ۔

بھارتی فوج کی  فائرنگ سے میر محمد نامی شہری شہید جبکہ عصمت نامی بچی اور ایک خاتون خدیجہ بیگم زخمی ہوگئی تھیں۔

اس سے قبل 26 دسمبر 2019 کو بھارتی فوج  کی بلا اشتعال فائرنگ سے کاپاک فوج  کے 2 جوان شہید ہوگئے تھے جبکہ پاک فوج نے بھرپور جوابی کارروائی میں 3 بھارتی فوجیوں کو ہلاک اور متعدد کو زخمی کردیا تھا۔