کرغزستان کے پاکستان میں سفیر ایرک بسم حیوف سے وفاقی وزیر برائے پاور و پٹرولیم عمر ایوب خان کی  ملاقات ہوئی۔

ملاقات میں  کرغزستان کے سفیر نے وفاقی وزیر عمر ایوب کو 17 اور 18 فروری 2020ءکو بشکک میں ہونے والے مشترکہ وزارتی کمیشن کے اجلاس کے انتظامات کے بارے میں آگاہ کیا جبکہ وفاقی وزیر اور سفیر دونوں نے جے ایم سی کے ایجنڈے اور ممکنہ تعاون کے شعبوں پر بھی تبادلہ خیال کیا۔

اس موقع پر وفاقی وزیر عمر ایوب خان نے کہا کہ پاک کرغزستان مشترکہ وزارتی کمیشن ایک اہم فورم ہے جس میں اہم امور پر تبادلہ خیال کرنا اور دوطرفہ تجارت، آمدورفت، مواصلات اور توانائی سے متعلق فائدہ مند نتائج تک پہنچنا مقصد ہے۔

کرغزستان کے پاکستان میں سفیر ایرک بسم حیوف نے کہا کہ کرغزستان پاک چین اقتصادی راہ داری کا خیرمقدم کرتا ہے کیونکہ یہ خطے میں مقیم کرغزستان کے لئے ایک اہم تجارتی رابطہ ثابت ہوسکتا ہے۔

ملاقات میں وفاقی وزیر برائے پاور و پٹرولیم عمر ایوب خان اور کرغزستان کے پاکستان میں سفیر نے اتفاق کیا کہ دونوں ممالک کے مابین تعلقات دوستانہ اور باہمی بھائی چارہ پر مشتمل ہے اور مستقبل قریب میں دونوں ممالک کے درمیان تعلقات میں مزید بہتری آئے گی۔

واضح رہے اس سے قبل اسلام آباد میں پروائیویٹ پاور انفراسٹرکچر بورڈ کے اجلاس سے خطاب کرتے ہوئے وفاقی وزیر توانائی عمر ایوب خان نے کہا  تھاکہ بجلی کے شعبے میں کارکردگی میں بہتری لانے کے ساتھ مستحکم بنانے کیلئے اقدامات کئے جارہے ہیں اور اس شعبے میں مسابقت کو فروغ دیا جارہا ہے۔

حکومت بجلی کے شعبے میں انقلاب لارہی ہے، عمرایوب

وفاقی وزیر توانائی کا کہنا تھا کہ حکومت ہائیڈرو اور کول کے ساتھ ونڈ اور شمسی توانائی کو فروغ دیکر  بجلی نرخوں میں کمی کیلئے کوشاں ہے، ان شعبوں میں سرمایہ کاری  بڑھانے کیلئے سرماریہ کاروں کو ہر ممکن مراعات دی جارہی ہیں۔

عمر ایوب خان کا یہ بھی کہنا تھا کہ حکومت نئے منصوبوں  شروع کرنے میں سرمایہ کاروں کی حوصلہ افزائی کیلئے کاروبار کیلئے آسان ماحول کی فراہمی کو یقینی بنانے کے ساتھ نظام میں رکاوٹوں کو دور کررہی ہے۔

وفاقی وزیر توانائی عمر ایوب خان کا مزید کہنا تھا کہ تیرہ سو بیس میگاواٹ کا یہ کول پاور منصوبہ مارچ دو ہزار اکیس تک پیداوار شروع کردے گا۔