وزیراعلیٰ پنجاب سردار عثمان بزدار نے کہا ہے کہ  عوامی ریلیف کے لئے ارکان اسمبلی سے ہر قسم کا تعاون کیا جائیگا۔

تفصیلات کے مطابق چیف وہپ عامر ڈوگر نے وزیر اعلیٰ پنجاب اور گورنر پنجاب سے پارلیمنٹ ہاؤس میں ملاقات کی، جس میں پنجاب میں ترقیاتی منصوبوں اور عوامی نمائندوں کو درپیش مسائل پر گفتگو کی گئی۔

اس موقع پر  وزیراعلیٰ پنجاب نے ارکان اسمبلی کو درپیش انتظامی مسائل فوری ختم کرنے کی یقین دہانی کروائی جبکہ جنوبی پنجاب کے سول سیکرٹیریٹ کے قیام  سمیت فنڈز کی تقسیم کے علاوہ مصنوعی مہنگائی کے خاتمے کے لئے پرائس کنٹرول کمیٹیوں کو فوری فعال کرنے پر بھی مشاورت کی گئی۔

وزیراعلیٰ پنجاب سردار عثمان بزدار نے کہا یونین کونسل کی سطح پر پرائس کنٹرول کمیٹیاں بنانے کی تجویز ہے وہ بہتر انداز میں کام کرسکتی  ہیں اور عوامی ریلیف کے لئے ارکان اسمبلی سے ہر قسم کا تعاون کیا جائیگا ۔

پی ٹی آئی چیف وہیپ عامر ڈوگر نے کہا منتخب نمائندے فوری ریلیف چاہتے ہیں جس پر وزیراعلیٰ پنجاب نے کہا منتخب نمائندوں کو فنڈز بلا رکاوٹ ملیں گے۔

وزیراعلیٰ پنجاب کی زیرصدارت اعلیٰ سطح کا اجلاس

واضح رہے اس سے قبل بھی وزیراعلیٰ پنجاب سردار عثمان بزدار کی زیرصدارت وزیراعلیٰ آفس میں اعلیٰ سطح کا اجلاس ہوا، جس میں صوبے میں آٹے و گندم کی قیمتوں اور ڈیمانڈ و سپلائی کا جائزہ لیا گیا تھا۔

وزیراعلیٰ پنجاب عثمان بزدار نے  گندم کا سرکاری کوٹہ اوپن مارکیٹ میں فروخت کرنے والی فلور ملوں کے خلاف بلاامتیاز کارروائی کا حکم دیتے ہوئے کہا  تھا کہ کسی فلور مل کو گندم کا کوٹہ اوپن مارکیٹ میں فروخت کرنے کی اجازت نہیں دی جاسکتی جبکہ خلاف ورزی پر فلور ملوں کے خلاف قواعد و ضوابط کے تحت کارروائی ہوگی۔

 اس موقع پر عثمان بزدار نے  صوبے کے خارجی راستوں پر مانیٹرنگ کے نظام کو مزید موثر بنانے کی ہدایت کی۔

وزیراعلیٰ پنجاب نے کہا تھا  کہ صوبے کے عوام کا مفاد سب سے زیادہ مقدم ہے، عوام کو آٹے کی دستیابی کے حوالے سے کوئی شکایت نہیں ہونی چاہیئے جبکہ جس ضلع سے شکایت ملی، میں ایکشن لوں گا۔