لاہور  کی انسداد دہشت گردی کی خصوصی عدالت نے واہگہ بارڈر دھماکہ کیس کا فیصلہ سنا دیا۔

تفصیلات کے مطابق انسداد دہشت گردی کی خصوصی عدالت کے جج اعجاز احمد بٹر نے واہگہ بارڈر دھماکہ کیس کا فیصلہ سنایا۔

عدالت نے ملزم حسیب اللہ، حسین اللہ اور سعید جان کو سزا سنائی۔ مجرمان کو 5، 5 بار سزائے موت  جبکہ 24 بار عمر قید اور دس دس لاکھ روپے جرمانہ بھی عائد کیا گیا ہے۔

عدالت نے مقدمے میں 101 گواہان کے بیانات ریکارڈ کئے تھے۔ ملزم شفیق، غلام حسین اور عظیم کو شک کا فائدہ دے کر بری کر دیا۔

انسداد دہشت گردی عدالت لاہور نے واہگہ بارڈر دھماکہ کیس  کے فیصلے کے بعد مجرم حسین اللہ کی سزا کی روبکار سپرنٹنڈنٹ جیل کوٹ لکھپت کو بھجوا دی۔

مجرم حسین اللہ کو شاہد محمود، ظفر اقبال اور عبدالمعیذ کے قتل میں 3 بار سزائے موت کا حکم سنایا گیا ہے۔عدالت کا مجرم کو تینوں مقتولین کے وارثان کو 10، 10 لاکھ روپے معاوضہ بھی دینے کا حکم دیا ہے۔

روبکار کے مطابق عدالت نے مجرم کو 30 افراد کے اقدام قتل کی دفعات کےتحت جرم ثابت ہونے پر 300 سال قید بامشقت کی سزا بھی سنائی ہے۔مجرم کی ایک سزا ختم ہونے کے بعد دوسری سزا شروع کی جائے گی۔

روبکار میں کہا گیا کہ لاہور ہائیکورٹ سے مجرم کی اپیل مسترد ہونے کے بعد سزائے موت پر عملدرآمد کیا جائے۔