ماحولیاتی تبدیلی کی وزیر مملکت زرتاج گل نے کہا ہے کہ ماحولیاتی تبدیلیوں سے نمٹنے کے لئے اقدامات کر رہے ہیں ۔

تفصیلات کے مطابق وزیر مملکت زرتاج گل نے اپنے بیان میں کہا کہ ملک میں ابھی تک وزارت ماحولیاتی تبدیلی کی وزارت صحت اور دیگر وزارتوں کے درمیان کوآرڈینیشن نہیں ہے۔

ماحولیاتی تبدیلی کی وزیر مملکت نے  کہا کہ جو ڈیٹا آرہا ہے اس کے مطابق ماحولیاتی تبدیلیوں سے کینسر کی اطلاعات موصول ہوئی ہیں تاہم جب تک ڈیٹا مکمل نہیں ہوتا اس وقت تک صحیح صورتحال سامنے نہیں آسکی۔

زرتاج گل نے یہ بھی کہا کہ چوٹی بالا ڈی جی خان میں فیکٹری میں کیمیکل کے اخراج سے 200 سے زائد اموات ہوئی تھیں۔ اس کیس کو ٹیسٹ کیس بنا کر کام کرنے کی ضرورت ہے۔

ماحولیاتی تبدیلی کی وزیر مملکت زرتاج گل نے مزید کہا کہ وزارت متعلقہ اداروں کی استعداد کار میں بہتری کے لئے اقدامات کرتی ہے اور اس حوالے سے ہدایات بھی جاری کرتی ہے۔

واضح رہے کہ اس سے قبل بھی موسمیاتی تبدیلی کی وزیر زرتاج گل وزیر نے کہا تھا کہ بدعنوان عناصر اور لوٹ مار کرنے والوں کا ان کی بدعنوانی رقوم کی غیر قانونی منتقلی اور دوسرے غلط کاموں کے بارے میں احتساب کیا جارہا ہے۔

بدعنوان عناصر کا بلاتفریق احتساب کیا جائیگا،زرتاج گل

زرتاج گل نے کہا  تھا کہ بدعنوان عناصر کا بلاتفریق احتساب کیا جائیگا،بدعنوانی کے الزامات میں جیلوں میں قید افراد اپنی صحت کے مسائل پر واویلا کرتے ہوئے دعوی کرتے ہیں کہ ان کا علاج صرف بیرون ملک ممکن ہے۔

ماحولیاتی تبدیلی کی وزیر مملکت زرتاج گل نے مزید کہا  تھا کہ پاکستان تحریک انصاف کی حکومت قانون کی حکمرانی اور آئین کی بالادستی پر یقین رکھتی ہے۔