امیر جماعت اسلامی سراج الحق نے کہا ہے کہ کشمیر حکمرانوں کا نہیں ، پاکستانی قوم اور پاکستان کا مسئلہ ہے ۔

تفصیلات کے مطابق امیر جماعت اسلامی سراج الحق نے یوم یکجہتی کشمیر بھرپور انداز سے منانے کی اپیل کرتے ہوئے کہا کہ عوام یوم یکجہتی کشمیر پر جو ق در جوق گھروں سے نکلیں اور ریلیوں میں شرکت کریں ۔

سراج الحق نےکہا کہ عالمی استعمار کے غلام حکمرانوں کی اپنی مجبوریاں ہیں جو انہیں کھل کر کشمیریوں کا ساتھ دینے سے روک رہی ہیں۔

امیر جماعت اسلامی نے یہ بھی کہا کہ 27 ستمبر کی اقوام متحدہ میں تقریر کے بعد سے وزیراعظم ایسے خاموش ہوئے ہیں جیسے اس تقریر سے ان کا کوئی واسطہ ہی نہ ہو ۔

سراج الحق نے کہا کہ 5 اگست کے بھارتی اقدام کے بعد اقوام متحدہ ، عالمی برادری، خصوصاً پاکستان کا فرض تھا کشمیریوں کے ساتھ کھڑے ہوتے، بھارت نے کشمیر کی خصوصی حیثیت ختم کر کے عالمی قوانین اور اقوام متحدہ کی قرار دادوں کو پامال کیا۔

تبدیلی کا آغاز وزیراعظم اور صدر کو اپنی ذات سے کرنا چاہیے، سراج الحق

سراج الحق نے یہ بھی کہا کہ کشمیر کی آزادی کے لیے حکومت تقریروں اور بیانات سے ڈنگ ٹپاﺅ پالیسی پر گامز ن ہے ، حکومت کو کشمیر کی آزادی اور وہاں مظالم رکوانے سے کوئی غرض نہیں ۔

امیر جماعت اسلامی سراج الحق نے مزید کہا کہ 5فروری کو اسلا م آباد سمیت ملک بھر میں کشمیریوں کے ساتھ اظہار یکجہتی کے شاندار عوامی مظاہرے کریں گے۔

واضح رہے کہ اس سے قبل بھی  امیر جماعت اسلامی نے لاہور میں تقریب سے خطاب کرتے ہوئے کہا  تھا کہ وزیراعظم کے قوم سے وعدے ہوا میں تحلیل ہو گئے ہیں، موجودہ حکومت وینٹی لیٹر پر ہے مصنوعی سانس سے کب تک زندگی بچائی جائے گی ۔

امیر جماعت اسلامی نے کہا تھا کہ وزیراعظم نے اعلان کیا تھاکہپی ٹی آئی کے سونامی نے لوگوں سے روزگار ، چھت اور اب نوالہ چھیننا شروع کردیا ہے ۔