وزیرریلوے شیخ رشید احمد نے کہا ہے کہ حکومت مہنگائی میں اضافے کی روک تھام کے لئے ٹھوس اقدامات کررہی ہے۔

تفصیلات کے مطابق وفاقی وزیر ریلوے میاں شیخ رشید نے اپنے ایک بیان میں کہا کہ حکومت  مہنگائی اورافراط زر میں اضافے کی روک تھام کے لئے درست سمت میں گامزن ہے اور اورمتعلقہ مسائل پرجلدقابوپالیاجائے گا۔

شیخ رشیداحمد نے کہا کہ بدعنوان عناصر کے خلاف احتساب کاعمل تیز کرنے کے لئے نیب قوانین میں بہتری لانے کی ضرورت ہے۔

وفاقی وزیر ریلوے نے یہ بھی کہا کہ تحریک انصاف کی حکومت کو حزب اختلاف سے کوئی خطرہ نہیں ہے کیونکہ مسلم لیگ نون اورپیپلزپارٹی دونوں جماعتیں جمہوری نظام کی حمایت جاری رکھیں گی۔

کراچی سرکلرریلوے اورایم ایل ون منصوبے کے حوالے سے وفاقی وزیرنے کہاکہ حکومت سپریم کورٹ کے احکامات کے مطابق ان منصوبوں کومقررہ مدت میں مکمل کرنے کی پابندہے۔

وفاقی وزیر ریلوے میاں شیخ رشید احمدنے  مزیدکہاکہ کراچی سرکلرریلوے منصوبہ اگرچہ سندھ حکومت کی ذمہ داری ہے تاہم وفاقی حکومت سرکلرریلوے کی بحالی کے لئے وسیع ترمفادمیں تمام ممکنہ تعاون فراہم کرے گی۔

واضح رہے کہ گزشتہ روز وفاقی وزیر ریلوے شیخ رشید احمد کی خصوصی ہدایت پر پاکستان ریلوے نے سینئر سٹیزن اور معذور افراد کا ای ٹکٹنگ کے ذریعے رعایتی ٹکٹ بک کرانے کی سہولت دینے کا کام شروع کردیا ہے۔

ترجمان ریلوے کا کہنا تھا کہ چند دن میں ہی معذور و ضعیف العمر افراد اِس سہولت سے مستفید ہوسکیں گے۔

ترجمان ریلوے کا  یہ بھی کہنا تھا کہ چند روز میں ریلوے انتظامیہ کی طرف سے سینئر سٹیزن /معذور افراد کی سہولت کے لیے ای ٹکٹنگ فارم متعارف کروایاجائے گا ۔

ترجمان ریلوے نے  مزید کہا تھا کہ متعلقہ ڈویژنل سپرنٹنڈنٹ آفس میں یہ فارم پُر کرکے ایک ہی بار جمع ہوگا۔

یاد رہے کہ اس سے قبل  عدالت نے شیخ رشید سے ریلوے کا بزنس پلان طلب کرتے ہوئے کہا تھا کہ پلان پرعمل نہ کیا توتوہین عدالت کی کارروائی کریں گے۔

سپریم کورٹ میں چیف جسٹس گلزار احمد کی سربراہی میں ریلوےخسارہ کیس کی سماعت ہوئی   تھی جس میں وزیرریلوے شیخ رشید عدالت میں پیش ہوئے۔