سندھ حکومت کی جانب سے کشمیر ڈے کو یوم کشمیر کے موقع پر عام تعطیل کا اعلان کردیا گیا ہے۔

تفصیلات کے مطابق سندھ کی صوبائی حکومت نے یوم کشمیر کے موقع پر 5 فروری کو صوبے بھر میں عام تعطیل کا اعلان کردیا ہے جس کا نوٹیفکیشن بھی جاری کردیا گیا ہے۔

سندھ حکومت کی جانب سے جاری کردہ اعلامیے کے مطابق کشمیر ڈے کے دن کشمیری شہداء کی یاد میں ایک منٹ کی خاموشی بھی اختیار کی جائے گی۔

صوبے میں 5 فروری کو تمام صوبائی محکموں، خود مختار کارپوریشنز، نیم و سرکاری اداروں اور لوکل کونسل میں عام تعطیل ہوگی۔

5 فروری کو کشمیری بھائیوں سے اظہار یکجہتی کی تیاریاں جاری

یاد رہے کہ 5 فروری کو کشمیری بھائیوں سے اظہار یکجہتی کے لئے پروگراموں اور ریلیوں کی بھرپور تیاریاں جاری ہیں۔

 اس کے علاوہ کشمیری مسلمانوں سے اظہار یکجہتی کے لئے مذہبی وسماجی تنظیمیں ریلیاں نکالیں گی۔

واضح رہے کہ کشمیریوں سے اظہار یکجہتی کے لیے سماجی رابطے کی ویب سائٹ ٹویٹر پر بھی ٹاپ ٹرینڈز بن گئے ہیں، جن میں کشمیر ہسٹری اور کشمیریوں سے یکجہتی کا دن شامل ہیں۔

اس سے قبل یکجہتی کونسل نےمقبوضہ کشمیر پر بھارتی مظالم کےخلاف فتویٰ میں کفار کے مسلمانوں پر غلبے کو ناجائز قرار دے دیا اور کہا ہندوستانی ظالموں سےکسی قسم کا تعاون کرناحرام ہے ، اہل اسلام کو چاہیےکشمیری بھائیوں کا ساتھ دے۔

خیال رہے 5 اگست کے بعد سے مقبوضہ کشمیرمیں لاک ڈاؤن برقرار ہے، شدیدسردی میں کشمیری دواؤں، کھانے پینے کی اشیا کے بحران کا شکار ہے جبکہ تعلیمی ادارے، کاروباری مراکز بند ہے اور انٹرنیٹ، موبائل سروس بدستور معطل ہے۔