آزاد جموں و کشمیر کے وزیراعظم راجہ محمد فاروق حیدر خان نے کہا ہے کہ مسئلہ کشمیر ہمارے لئے زندگی اور موت کا مسئلہ ہے جبکہ بھارت کشمیرہوں کا حوصلہ توڑنا چاہتا ہے مگر اس کو ناکامی ملے گی۔

تفصیلا ت کے مطابق آزاد جموں و کشمیر کے وزیراعظم راجہ محمد فاروق حیدر خان نے جموں و کشمیر ہاﺅس اسلام آباد میں کشمیر جرنلسٹ فورم کی تقریب حلف برداری سے خطاب کرتے ہوئے کشمیر جرنلسٹ فورم کیلئے 30 لاکھ روپے کے فنڈز کا اعلان کیا۔

اپنے بیان میں راجہ محمد فاروق حیدر خان کا کہنا تھا کہ درست معلومات فراہم کرنا میڈیا کی اولین ذمہ داری ہےجبکہ صحافیوں کا کام خبر کے علاوہ اصلاح معاشرہ بھی ہے۔

راجہ محمد فاروق حیدر خان نے کہا کہ صحافی کی کریڈیبیلیٹی اصل سرمایہ ہے ،ہم نے کوشش کی ہے کہ ریاست میں صحافیوں کی فلاح و بہبود یقینی بنائی جائے جبکہ آزاد صحافت سے حکومت کو فائدہ ہوتا ہے اس لئے صحافیوں کو قوم کی درست سمت میں رہنمائی کرنی چاہیے ۔

آزاد جموں و کشمیر کے وزیراعظم نے یہ بھی کہا کہ کشمیر اور کشمیرہوں کے معاملے پر کسی قسم کی کنفیوژن نہیں ہے، خطے کے حالات کا تقاضا ہے کہ اپنی فوجی قوت میں اضافہ کیا جائے۔

راجہ محمد فاروق حیدر خان کا کہنا تھا کہ بھارت ہمیشہ ہمیں دھوکہ دے گا،وہ ہمیشہ مغرب کےلئے پرکشش رہے گا، بھارت نے اپنا مثبت تشخص بنایا ہے مگر وہ اندر سے ایسا نہیں،وہاں شہریت کے حوالے سے جو قانون بن رہا ہے لوگ اس کے خلاف کھڑے ہو گئے ہیں  اور بھارت کا معاشرہ مودی کی وجہ سے ٹوٹ پھوٹ کا شکار ہے۔

راجہ محمد فاروق حیدر خان نے یہ بھی کہا کہ بھارت سے کسی قسم کی بہتری کی توقع نہ کریں کیونکہ مودی ایک شو پیس ہے اصل دماغ والے پیچھے بیٹھے ہیں، مودی کی بیوقوفانہ باتوں کو سنجیدہ نہیں لینا چاہیے۔

آزاد جموں و کشمیر کے وزیراعظم کا کہنا تھا کہ کہ ہمیں ٹیم ورک بہتر بنانے اور جارحانہ انداز میں آگے بڑھنے کی ضرورت ہے، مودی نے دونوں ملکوں کے درمیاں دوطرفہ معاہدوں کو توڑا ہے، وقت آ گیا ہے کہ بھارت کو روکا جائے۔

کوئی قانون کشمیریوں کو ایل او سی پار کرنے سے نہیں روک سکتا، راجہ فاروق حیدر

راجہ محمد فاروق حیدر خان کا یہ بھی کہنا تھا کہ مودی جنگ کی دھمکیاں دے رہا ہے مگر وہ جنگ کرے گا نہیں، وہ ہمیں نفسیاتی دباﺅ میں رکھنا چاہتا ہے، میری تجویز ہے کہ قوم کو اعتماد میں لے کر لوگوں سے پوچھا جائے کہ ہمیں کیا کرنا چاہئے۔

آزاد جموں و کشمیر کے وزیراعظم راجہ محمد فاروق حیدر خان کا مزید کہنا تھا کہ کہ اگر ہم نے کوتاہی کی تو اللہ پاک ہمیں معاف نہیں کرے گا، بھارتی فوج مظلوم کشمیریوں پر مظالم ڈھا رہی ہے، کشمیری بھارت کے خلاف ڈٹ کر کھڑے ہیں، بھارت کشمیرہوں کا حوصلہ توڑنا چاہتا ہے مگر اس کو ناکامی ملے گی۔

تقریب سے فورم کے صدر زاہد اکبر عباسی، پی ایف یو جے کے سابق صدر افضل بٹ، نیشنل پریس کلب کے صدر شکیل قرار اور سیکرٹری فورم عقیل انجم نے بھی خطاب کیا۔ اس کے علاوہ صحافیوں کی کثیر تعداد نے شرکت کی۔