سندھ بھر میں تعلیمی ادارے 13 مارچ تک بند رہیں گے جس کا نوٹیفکیشن جاری کردیا گیا ہے۔

تفصیلات کے مطابق کرونا وائرس کے سبب وزیراعلیٰ سندھ نے صوبے میں تعلیمی اداروں کو بند رکھنے کا فیصلہ کیا تھا، محکمہ اسکولز ایجوکیشن سندھ نے تعلیمی ادارے بند رکھنے کا نوٹیفکیشن جاری کردیا۔

محکمہ تعلیم حکام کا کہنا ہے کہ سندھ حکومت نے اسکولز اور کالجز کے ساتھ ساتھ ٹیوشنز اور کوچنگ سینٹرز بھی بند کرنے کی ہدایت کی۔

محکمہ تعلیم کا مزید کہنا تھا کہ احکامات پر سب کو عمل کرنا ہوگا چاہے اور اگر احکامات نہ مانے  گئےتو  تعلیمی ادارے کھولنے والوں کے خلاف کارروائی ہوگی۔

یاد رہے کہ اس سے قبل کراچی میں کورونا وائرس کا کیس سامنے آنے کے بعد سندھ حکومت نے فیصلہ کیا تھا کہ سندھ کے تمام سرکاری و نجی تعلیمی ادارے 13 مارچ تک بند رہیں گے۔

اس موقع پر سیکریٹری تعلیم سندھ خالد حیدر شاہ کی بول نیوز سے گفتگو کرتے ہوئے کہا کہ سندھ میں اسکول کی تعطیل 13 مارچ تک کرنے کا فیصلہ وزیراعلی سندھ کی زیرصدارت اجلاس میں کیا گیا ہے ۔

سیکریٹری تعلیم سندھ  نے مزید کہا کہ صوبہ بھر میں تمام نجی و سرکاری تعلیمی اداروں کی تعطیلات کا فیصلہ دنیا بھر میں تیزی سے پھیلتے کورونا وائرس کے باعث کیا گیا ہے۔

کورونا وائرس : سندھ بھر میں تعلیمی ادارے 2 مارچ تک بند رہیں گے

دوسری جانب  وزیر اعلیٰ سندھ سید مراد علی شاہ کی زیر صدات کورونا وائرس ٹاسک فورس پر لگاتا چوتھے روز اجلاس ہوا، جس میں وزیراعلیٰ سندھ نے کرونا وائرس کے پیش نظر 13 مارچ تک تمام تعلیمی ادارے بند رکھنے کا فیصلہ کیا ہے ۔

وزیر اعلیٰ سندھ سید مراد علی شاہ نے کہا ہے کہ ایران سے آئے لوگ پاکستان کے لئے خطرہ ہیں، اسکول بند کرنے کا مقصد جو لوگ ایران سے آئے ہیں اور اپنے بچوں سے ملے ہیں انکی تشخیص کرنا ہے۔

یاد رہے کہ پاکستان میں  کورونا وائرس سے متاثرہ دو مریضوں کی تصدیق ہوگئی ہے، چند روز قبل ایران سے کراچی واپس آنے والے 22 سالہ نوجوان میں کورونا وائرس کی تصدیق ہوئی تھی۔

خیال رہے کہ کروناوائرس کی پاکستان منتقلی کے خدشے کے پیش نظر باچاخان ایئرپورٹ پر حفاظتی اقدامات کیے جانے لگے ہیں، ایئرپورٹ پر سول ایوی ایشن اتھارٹی کی جانب سے نئی اسکریننگ کے انتظامات کیے گئے ہیں۔