چیئرمین رویت ہلال کمیٹی مفتی منیب الرحمان نے کہا ہے کہ میڈیا فحاشی اور عریانی کے پروگرام بند کریں، مساجد میں پانچ وقت نماز ہوگی۔

تفصیلات کے مطابق گورنر ہاوس سندھ میں چیئرمین رویت ہلال کمیٹی مفتی منیب الرحمان  نے نیوز کانفرنس سے خطاب کرتے ہوئے کہا کہ جمعہ کے خطبے کو مختصر رکھا جائے اور نمازی نماز کی ادائیگی کے ساتھ ہی فوری گھر جائیں، کورونا وائرس کے باعث نماز گھر پر ادا کی جاسکتی ہے، نابالغ بچے مسجد میں نہ آئیں۔

چیئرمین رویت ہلال کمیٹی نے کہا کہ مساجد سے قالین ہٹا کر فرش کو اچھے طریقے سے صاف کیا جائے،، لوگ گھر سے وضو کریں جبکہ سنت اور نوافل گھر میں ادا کریں۔

مفتی منیب الرحمان  نے یہ بھی کہا کہ جن لوگوں کو کورونا وائرس کا شبہ ہو وہ مسجد میں نہ آئیں ، ایسے افراد کو جماعت ترک کرنے کا گناہ نہیں ہوگا، ائمہ کرام جمعہ کے خطبات میں کورونا وائرس کے حوالے سے آگاہی پھیلائیں۔

چیئرمین رویت ہلال کمیٹی مفتی منیب الرحمان نے مزید کہا کہ اس وباء میں پورا عالم اسلام اس میں مبتلا ہیں ، جو اہل ایمان ہیں وہ احتیاطی تدابیر بھی اختیار کریں اور اللہ سے انفرادی اور اجتماعی طور پر رجوع کریں ۔

  اس موقع پر گفتگو کرتے ہوئے مفتی تقی عثمانی  نے کہا کہ ہمارے ملک میں کرونا وائرس کا مسئلہ اہمیت اختیار کر گیا ہے ،کوئی بھی وباء اللہ کے حکم کے بغیر نہیں جاسکتی ہے جبکہ احتیاطی تدابیر اختیار کرنا بھی سنت رسول صلی اللہ علیہ وسلم میں ہے اور کوئی بھی بیماری اللہ کی مصلحت کے بغیر نہیں لگتی ہے۔

  مفتی تقی عثمانی نے مزید کہا کہ ہم نے اپنی ماضی میں جس طرح اللہ کی نافرمانیاں کی،سب سے پہلے مسلمان کو اللہ سے رجوع کرنا چاہیے  جبکہ ہمارے معاشرے عریانی، فحاشی ، رشوت خوری جیسے تمام گناہوں کی معافی مانگی چاہیے۔

گورنر ہاوس سندھ   میں ہونے والی اس  نیوز کانفرنس میں مفتی تقی عثمانی، مفتی منیب الرحمن اور علامہ شہنشاہ نقوی سمیت دیگرشریک ہوئے۔