پاکستان ایئر لائن ( پی آئی اے ) نے  کورونا وائرس سے بچاؤ کے لیے احتیاطی تدبیر کے طور پر تمام بین الاقوامی پروازیں معطل کرنے کا فیصلہ کرلیا۔

ترجمان پی آئی اے عبداللہ خان کا کہنا ہے کہ حکومت پاکستان کی ہدایات کے مطابق قومی ایئر لائن نے اپنی تمام بین الاقوامی پروازیں منسوخ کردی ہیں۔

ترجمان کا کہنا ہے کہ پابندی کا اطلاق ہفتہ 21 مارچ شب 8 بجے سے لے کے 28 مارچ تک ہوگا۔ مسافروں کو پیش آنے والی دشواریوں  کے لیے معذرت خواہ ہیں مگر پرہیز علاج سے بہتر ہے۔

پنجاب سے سندھ جانے والی ٹرینیں بند کردی گئیں

پی آئی اے ترجمان عبداللہ خان کا کہنا ہے کہ پی آئی اے کا مقامی آپریشن  معمول کے مطابق جاری رہے گا ۔ مزید معلومات اور بکنگ  کی تبدیلی  کے لیے پی آئی اے کال سنٹر سے رابطہ کریں۔

واضح رہے کہ ملک میں ٹرین سروس   جبکہ صوبہ سندھ میں انٹرا بس سروس بھی تقریباً معطل ہے۔

وزیر ریلوے شیخ رشیدنے کہا ہے کہ میں لاک ڈاؤن  نہ کرنے کے حوالے سے وزیراعظم سے متفق ہوں لیکن حالات کے تناظر میں  ملک بھرمیں 34ٹرینیں بند کرنے کا فیصلہ کیا ہے۔

انہوں نے کہا کہ کل شام 12ٹرینیں بند ہوں گی جبکہ 22 ٹرینیں 24 تاریخ سے بند ہوں گی۔

وزیر ریلوے شیخ رشید  نے مزید کہا کہ اس وقت 134 ٹرینیں چل رہی ہیں جن میں 34 بند کر دی ہیں ، اب  صرف 100 ٹرینیں  ٹریک پر چلا کریں گی جبکہ 12 سے 15 فریٹ ٹرینیں معمول کے مطابق چلیں گی ۔