وزیراعظم عمران خان نے کہا ہے کہ حکومت کرونا کے حوالے سے غافل نہیں ہے۔

تفصیلات کے مطابق وزیراعظم عمران خان سے سینئر صحافیوں کی ملاقات ہوئی، ملاقات میں عمران خان کا کہنا تھا کہ کرونا سے متعلق  معاملات کی خود نگرانی اور اس حوالے سے مسلسل اجلاسوں کی صدارت کررہا ہوں ۔

اس موقع پر وزیراعظم  کا یہ بھی کہنا تھا کہ کرونا کے پھیلائو کو روکنے کے لیے تمام ضروری اقدامات اٹھائے جارہے ہیں جبکہ کرونا کے حوالے سے جو اقدامات اٹھانے پڑے اٹھائے جائیں گے ۔

ملاقات میں عمران خان نے  اعلان کیا کہ وزیراعلیٰ پنجاب عثمان بزدار تبدیل نہیں ہوں گے، عثمان بزدار ہی بدستور پنجاب کے وزیراعلیٰ رہیں گے۔

 وزیراعظم نے کہا کہ عثمان بزدار حکومت کو بخوبی چلا رہے ہیں اور عثمان بزدار کی کارکردگی قابل تحسین ہے۔

 عمران خان نے یہ بھی کہا کہ آٹا اور چینی بحران کے ذمہ داران کو بچانے کا تاثر درست نہیں جبکہ میں آٹا اور چینی بحران سے متعلق حتمی تحقیقاتی رپورٹ کا منتظر ہوں۔

وزیر اعظم سے گورنر سندھ کی اہم ملاقات

وزیراعظم عمران خان  نے مزید کہا کہ آٹا اور چینی بحران میں جو بھی ملوث نکلا اس کے خلاف سخت کارروائی کروں گا اور اگر میرا کوئی بہت قریبی بھی ملوث پایا گیا تو اسے معاف نہیں کروں گا۔

یاد رہے اس سے قبل وزیراعظم عمران خان سے گورنر سندھ عمران اسماعیل نے ملاقات کی تھی۔

اس اہم ملاقات میں کراچی میں وفاقی حکومت کے ترقیاتی منصوبوں کیساتھ سندھ کی مجموعی صورتحال پر تبادلہ خیال کیا گیا تھا۔

 وزیراعظم نے کہا تھا کہ کراچی ملک کامعاشی حب ہے، شہر کی ترقیاتی ضروریات اور عوام کو درپیش مسائل کا مکمل ادراک ہے، وفاقی حکومت عوام کو سہولیات کی فراہمی کے لیے اپنی کوششیں جاری رکھے گی۔

اس کے ساتھ ساتھ عمران خان نے گورنر سندھ کو ہدایت کی تھی کہ کراچی کی عوام کی ضروریات مد نظر رکھتے ہوئے دیگر ترقیاتی منصوبوں کی بھی جامع منصوبہ بندی کی جائے۔