وزیر قانون پنجاب راجہ بشارت  نے کہا ہے  کہ کوئی بھی حکومت لاء اینڈ آرڈر کی صورتحال بہتر بنائے بغیر احتساب کی طرف نہیں جا سکتی۔

تفصیلات کے مطابق وزیر قانون پنجاب راجہ بشارت نے  ڈائریکٹر جنرل پبلک ریلیشنز (ڈی جی پی آر) میں میڈیا سے گفتگو کرتے ہوئے کہا کہ پنجاب حکومت قانون نافذ کرنیوالے اداروں میں اصلاحات لا رہی ہے۔

اپنے بیان میں وزیر قانون پنجاب نے کہا کہ  کرپشن ختم کرنے سے پہلے ضروریات پوری کرنے کی ضرورت ہے ۔

راجہ بشارت   نے یہ بھی کہا کہ پولیس کی کارکردگی وسائل پر منحصر ہوتی ہے لیکن  پنجاب پولیس کے پاس دوسرے ممالک کی پولیس کے مقابلے میں کم وسائل ہیں اور ان کم وسائل کے ساتھ ہم بہت زیادہ اچھے نتائج حاصل نہیں کرسکتے۔

پاکستان میں تمام اقلیتوں کو ہر طرح کی مذہبی آزادی حاصل ہے، راجہ بشارت

وزیر قانون پنجاب کا کہنا تھا کہ پولیس کے انفراسٹرکچر کو بہتر کر رہے ہیں اور پولیس کی کارکردگی کو بہتر بنانے کے لیے پالیسیز  جبکہ پولیس کے رویے اور اخلاقیات کے حوالے سے سلیبس لا رہے ہیں ۔

  راجہ بشارت  کا یہ بھی کہنا تھا  کہ گزشتہ حکومت نے پولیس کا بجٹ 5.12 فیصد رکھا ہم اس کو 5.53 پر لے گئے جبکہ پاکستان تحریک انصاف کی حکومت پنجاب پولیس کے آئندہ بجٹ میں اضافہ کر رہی ہے ۔

وزیر قانون پنجاب راجہ بشارت  کا مزید کہنا تھا کہ 101 پولیس اسٹیشن لینڈ کے بغیر ہیں ان کو فوری جگہ فراہم کرنے کے لیے بورڈ آف رویونیو کو خط لکھا گیا ہے جبکہ گریڈ 17 18 19 اور 20.کے افسران کی تنخواوں دوسرے سروسز کی نسبت کم ہیں اس تضاد کو ختم کرنے کا فیصلہ کیا ہے، اتنے وسائل دینے کے بعد ہم ان سے بہتر کارکردگی کی توقع کرینگے۔