پنجاب اسمبلی میں قائد حزب اختلاف حمزہ شہباز شریف کی ضمانت منسوخ کرنے کے لیے قومی احتساب بیورو (نیب) نے کا سپریم کورٹ  سے رجوع کر لیا ۔

تفصیلات کے مطابق قومی احتساب بیورو(نیب ) نے سپریم کورٹ میں حمزہ شہباز کی ضمانت منسوخی کے لیے درخواست دائر کردی ۔

درخواست میں موقف اختیار کیا گیا کہ حمزہ شہباز کو لوکل گورنمنٹ کو جاری 360 ملین کی رقم میں مبینہ کرپشن کے الزام میں گرفتار کیا گیا جبکہ  یہ رقم نو کلومیٹر لمبے ویسٹ واٹر کی نکاسی کے منصوبہ کے لیے استعمال ہونا تھی اور رمضان شوگر ملز کے منصوبہ کو عوامی منصوبہ ظاہر کیا گیا۔

درخواست میں یہ بھی کہا گیا کہ حمزہ شہباز شریف کے خلاف شکایت آنے پر انکوائری کی گئی جبکہ ان کی  درخواست ضمانت قابل سماعت نہیں تھی  کیونکہ تحقیقات سے ظاہر ہوا کہ وزیرِاعلیٰ پنجاب شہبازشریف نے اپنے اختیارات کا ناجائزاستعمال کیا۔

پاکستانی تاریخ میں کبھی اتنی مہنگائی نہیں ہوئی، حمزہ شہباز 

درخواست میں مزید  کہا گیا  کہ شہباز شریف نے رمضان شوگر ملز کو سرکاری خزانے سے فائدہ پہنچایا جبکہ لاہور ہائیکورٹ نے حقائق کا درست جائزہ نہیں لیا لہذا لاہور ہائیکورٹ کے فیصلے کو کالعدم قرار دیتے ہوئے ضمانت منسوخ کی جائے۔

یاد رہے فروری میں لاہور ہائی کورٹ نے رمضان شوگر ملز کیس میں اپوزیشن لیڈر پنجاب اسمبلی حمزہ شہباز کی ضمانت منظور کی تھی جبکہ آمدن سے زائد اثاثہ جات کیس میں جوڈیشل ریمانڈ پر ہیں۔

خیال رہے منی لانڈرنگ اورآمدن سےزائد اثاثوں پر شریف فیملی کےخلاف مختلف زاویوں سےتحقیقات جاری ہے اور نیب نے لاہور ہائی کورٹ کی عبوری ضمانت میں توسیع مسترد ہونے کے بعد حمزہ شہباز کو گرفتار کیا تھا  جبکہ اپریل میں نیب نے ان کی گرفتاری کے لیے لاہور میں ان کی رہائش گاہ پر چھاپے بھی مارے تھے۔