حکومت نے کرونا کے مشتبہ مریضوں کو ایران سے واپس لانے کا فیصلہ کیا ہے۔

تفصیلات کے مطابق حکومت نے فیصلہ کیا ہے کہ 2028 پاکستانیوں کو ایران سے واپس لاکرانہیں  کوئٹہ منتقل کیا جائے گا۔

ذرائع کے مطابق ایران سے مشتبہ پاکستانی مریضوں کو تافتان بارڈر سے منتقل کیا جائے گا۔

ذرائع کا کہنا تھا کہ  یہ پاکستانی ایران میں ایک ہفتہ قرنطینہ مکمل کر چکے ہیں، وطن واپسی پر بھی ان مسافروں کو کوئٹہ میں ایک ہفتہ قرنطینہ میں رکھا جائے گااور  اس سلسلے میں کوئٹہ میں انتظامات کو حتمی شکل دی جا رہی ہے۔

ذرائع  کا مزید کہنا تھا کہ ایران میں دوران قرنطینہ ان پاکستانیوں میں کرونا وائرس کی علامات ظاہر نہیں ہوئیں، پاکستان میں ایک ہفتہ قرنطینہ میں علامات ظاہر نہ ہونے پر انھیں ڈسچارج کر دیا جائے گا۔

دوسری جانب کرونا وائرس سے بچاو اور اس کی روک تھام کے سلسلے میں پاک افغان بارڈر کو مزید سات دن کے لیے بند کردیا گیا۔

کراچی میں کورونا وائرس کا ایک اور مریض سامنے آگیا

سیکیورٹی حکام کے مطابق  افغانستان میں کرونا وائرس کے کیسز سامنے آنے کے بعد پاکستانی حکام نے گزشتہ ہفتے چمن میں پاک افغان بارڈر کو سات دن کےلیے بند کرنے کا اعلان کیا تھا جس کی بندش میں مزید توسیع کردی گئی ہے۔

سیکیورٹی حکام کاکہنا ہے کہ پاک افغان بارڈر کو مزید سات دن کے لیے بند کردیا گیا ہے جس کے بعد آج آٹھویں روز بھی بارڈر بند ہے۔

سیکیورٹی حکام نے بتایا کہ باب دوستی سے ہر قسم کی دوطرفہ آمدورفت معطل ہے اور سرحد سے آنے والوں کی اسکریننگ بھی جاری ہے۔

خیال رہے کہ ایران میں کرونا وائرس تیزی سے پھیلنے کے بعد پاکستانی حکام نے تفتان سے پاک ایران بارڈر کو بھی بند کر رکھا ہے اور گزشتہ ہفتے بارڈرکو 14 روز بعد تجارتی سرگرمیوں کے لیے کھول دیا گیا۔