وزیراعلیٰ پنجاب عثمان بزدار نے کہا ہے کہ پانی قیمتی اثاثہ، ہر قیمت پر ضائع ہونے سے بچائینگے، چھوٹے ڈیم اور آبی ذخائر بنا کر ہزاروں ایکڑ اراضی سیراب کرینگے۔

تفصیلات کے مطابق وزیراعلیٰ پنجاب سردار عثمان بزدار کی زیرصدارت چھوٹے آبی ذخائر کی تعمیر سے متعلق اجلاس منعقد ہوا جس میں صوبہ کے مختلف شہروں میں آبی ذخائر کی تعمیر کا جائزہ لیا گیا۔

اجلاس میں  عثمان بزدار کی جانب سے رودکوہیوں کے پانی کو محفوظ کرنے کے لئے ڈیرہ غازی خان اور راجن پور میں سمال ڈیم بنانے اور پراجیکٹ جلد مکمل کرنے کی ہدایت جاری کردی گئی ہے۔

سیکرٹری آبپاشی نے وزیراعلیٰ عثمان بزدار کو چھوٹے ڈیموں سے متعلق تفصیلی بریفنگ دی۔ وزیراعلیٰ عثمان بزدار کو مختلف شہروں میں فلڈ بند، سپر اور تالاب بنانے کے منصوبوں سے بھی آگاہ کیاگیا۔

وزیراعلیٰ عثمان بزدار نے اجلاس سے خطاب کرتے ہوئے کہا کہ پانی قیمتی اثاثہ ہے اسے ہر قیمت پر ضائع ہونے سے بچائیں گے، چھوٹے ڈیم بننے سے ہزاروں ایکڑ اراضی کو بنجر ہونے سے بچایا جاسکے گا۔

انہوں نے کہا کہ ڈیم اور آبی ذخائر بننے سے زیر زمین پانی کا لیول بلند ہوگا جبکہ چھوٹے ڈیم اور آبی ذخائر بنا کر پینے کے پانی کی ضروریات پوری کریں گے۔

انہوں نے کہا کہ رودکوہیوں کے پانی کو محفوظ کرنے کے لئے ڈیرہ غازی خان 7 اور راجن پور میں 6 سمال ڈیم بنائیں گے۔60کروڑ 19لاکھ روپے کی لاگت سے فلڈ بند اورسپر بنائے جائیں گے۔

ان کا کہنا تھا کہ ڈیر ہ غازی خان میں پینے کے پانی کی فراہمی اور آبپاشی کے لئے چار تالاب بنائیں گے، تالاب بننے سے انڈرگراؤنڈ واٹرلیول بلند ہوگا۔

دریائے سندھ کے کنارے گاجنی کے مقام پر فلڈ بند بنایا جائے گا۔راولپنڈی کو صاف پانی کی فراہمی کیلئے 6ارب روپے کی لاگت سے ڈھوڈچہ ڈیم بنایاجائے گا۔ 1ارب 56کروڑ روپے کی لاگت سے چہان ڈیم مکمل ہوگا۔ موہاٹہ ڈیم سے 4500ایکڑ اراضی کو سیراب کیا جائے گا۔ 5ارب30کروڑ روپے کی لاگت سے بننے والا پپن ڈیم15ہزار ایکڑ اراضی سیراب کرے گا۔

چکوال میں مہراہ شیرا ڈیم4ہزار ایکڑ اراضی سیراب کرے گا،68کروڑروپے لاگت آئے گی۔ 95کرروڑ روپے کی لاگت سے جہلم میں پنڈوری ڈیم سے 1500ایکڑ اراضی سیراب ہوگی۔ سوراہ ڈیم پر 91کروڑ روپے لاگت آئے گی۔ اٹک میں تاجا بارا ڈیم20کروڑ روپے کی لاگت سے بنے گا،300ایکڑ اراضی سیراب ہوگی۔سڈریال ڈیم سے 825ایکڑ اراضی سیراب ہوگی،ساڑھے10کروڑ روپے لاگت آئے گی۔

تلہ کنگ میں تمان ڈیم ڈیڑھ ارب روپے کی لاگت سے مکمل ہوگا۔گھبر ڈیم پر 5ارب 65کروڑ روپے سے بنے گا۔ چکوال میں دھرابی ڈیم کا منصوبہ مکمل ہونے سے 6400ایکڑ اراضی سیراب ہوگی۔ 34کروڑ روپے کی لاگت سے بننے والے دھرابی ڈیم سے پینے کیلئے صاف پانی بھی مہیا ہوگا۔ وزیراعلیٰ عثمان بزدار نے ہدایت کی کہ چھوٹے آبی ذخائر کے پراجیکٹ جلد مکمل کیے جائیں۔