وفاقی وزیر قانون بیرسٹر فروغ نسیم نے کہا ہے کہ ہم خواتین کی زندگیوں کو بہتر بنانے کے لیے کوششیں جاری رکھیں گے اور اگر خواتین کی آواز کو دبایا گیا تو ہم ان کی آواز بنیں گے۔

تفصیلات کے مطابق وفاقی وزیر قانون بیرسٹر فروغ نسیم نے خواتین کے عالمی دن کے موقع پر خواتین کو خراج تحسین پیش کرتہوئے کہا کہ خواتین کی حیثیت معاشرے میں ایک اثاثہ کی ہے ۔

  خواتین کے عالمی دن کے موقع پر وزیر قانون بیرسٹرنے اپنے پیغام میں  کہا کہ خواتین نئی نسل کو پروان چڑھا نے کے ساتھ ساتھ پاکستان کی بہتر ی کے لیئے بھی کام کر رہی ہیں۔

فروغ نسیم نے اپنے پیغام میں کہا کہ ماں، بہن، بیٹی ہونے سے لے کر ڈاکٹر، انجینئر، استاد اور ہر شعبہ زندگی میں عورت کا کردار ہے،عورت نے ثابت کیا ہے کہ وہ ہر کام کر سکتی ہے۔

8 مارچ خواتین کا عالمی دن

وفاقی وزیر قانون بیرسٹر کا کہنا تھا کہ ہمارا فرض ہے کہ خواتین کو یکساں مواقع فراہم کریں تاکہ وہ تبدیلی لانے میں کردار ادا کرے جبکہ خواتین کو ہراساں کئے جانے سے بچانے کے لئے ماحول پیدا کرنا ہماری ذمہ داری ہے۔

فروغ نسیم کا یہ بھی کہنا تھا کہ انفورسمینٹ آف ویمینز پراپرٹی رایئٹز ایکٹ خواتین کو انکے حقوق دلوانے کی جانب اہم قدم ہے ،اب خواتین کو جائیداد میں ان کے قانونی اور شرعی حق سے کوئی محروم نہیں کر سکے گا۔

وفاقی وزیر قانون بیرسٹر فروغ نسیم کا مزید کہنا تھا کہ مالی طور پر خودمختار عورت تشدد اور استحصال سے بچنے کی صلاحیت رکھتی ہے،ہماری حکومت اور وزارت قانون خواتین کی مالی خودمختاری کے لیئے کام کرے گی۔

 یاد رہے کہ پاکستان سمیت دنیا بھر میں آج خواتین کا عالمی دن منایا جارہا ہے۔

اقوام متحدہ نے 1656 میں 8 مارچ کو عورتوں کے عالمی دن کے طور پر منانے کا فیصلہ کیا تھا جبکہ اس کا مقصد خواتین کی سماجی، سیاسی اور اقتصادی جدوجہد کو خراج تحسین پیش کرنا ہے۔

یہ پہلی مرتبہ 1911 میں آسٹریا، ڈنمارک، جرمنی اور سوئٹزر لینڈ میں منایا گیا۔ اس حساب سے رواں برس 108 یوم خواتین منایا جا رہا ہے۔