پاک فضائیہ نے کورونا امدادی فنڈ میں اپنا حصہ ڈالنے کا فیصلہ کیا ہے۔

تفصیلات کے مطابق  پاک فضائیہ کے سربراہ ایئر چیف مارشل مجاہد انور خان  حکومت کی جانب سے اس وبائی مرض سے لڑنے کے لئے قائم کردہ فنڈ میں اپنی ایک ماہ کی تنخواہ عطیہ کریں گے ۔

ترجمان پاک فضائیہ  کا کہنا تھا کہ ملکی صورتحال کو مدنظر رکھتے ہوئے ، ایئر اسٹاف کی سطح پر فیصلہ کیا گیا ہے کہ پاک فضائیہ  کے تمام  افراد اس فنڈ میں اپنا حصہ ڈالیں گے جبکہ ائیر چیف کے علاوہ ، ایئر کموڈور ، ایئر وائس مارشل اور ائیر مارشل عہدوں کے افسران اپنی تین دن کی تنخواہ عطیہ کریں گے ۔

ملک میں کورونا وائرس کے افراد کی تعداد 1335 ہوگئی

ترجمان پاک فضائیہ  کا یہ بھی کہنا تھا کہ پائلٹ آفیسر رینک سے گروپ کیپٹن  تک  اپنی دو دن کی تنخواہ اس فنڈ میں دیں گے جبکہ ان کے ساتھ ساتھ   ایئرمن اور  سویلین عملہ بھی اپنی ایک دن کی تنخواہ کورونا ریلیف فنڈ میں جمع کرائیں گے۔

واضح رہے کہ  ملک میں کورونا وائرس کے آج 134 افراد میں مہلک وائرس کی تشخیص ہوئی جن میں سندھ سے 19  ، پنجاب میں 40 اور خیبرپختونخوا میں 57 ، اسلام آباد میں 2 جبکہ گلگت بلتستان میں 16 کورونا وائرس کے کیسز کی تصدیق ہوئی ہے جس کے بعد ملک بھر میں متاثرہ افراد کی تعداد 1335 تک پہنچ گئی ہے۔

پاکستان میں کوروناوائرس سے متاثرہ مریضوں کی اعداد و شمار کے مطابق اس وقت سندھ میں 440 ، بلوچستان میں 131 ، خیبرپختونخوا میں 180 ،اسلام آباد میں 27  ، گلگت بلتستان میں 107  ، پنجاب میں 448 اور آزاد کشمیر میں 2  مریض موجود ہے۔