صدر مملکت ڈاکٹر عارف علوی نے کہا ہے کہ حکومت ملک میں خواتین کے حقوق کے تحفظ اور صنفی بنیاد پر تشدد کے خاتمے کے لئے پرعزم ہے۔

تفصیلات کے مطابق صدر مملکت ڈاکٹر عارف علوی نے اپنے ایک بیان میں کہا کہ خواتین کو حق وراثت سمیت تمام بنیادی حقوق کی فراہمی حکومت کے پاکستان کو اسلامی فلاحی ریاست بنانے کے تصور کا حصہ ہے۔

 اپنے بیان میں ڈاکٹر عارف علوی نے دہشت گردی کے خاتمے کے حوالے سے حکومتی کوششوں کو اُجاگر کرتے ہوئے کہا کہ بین الاقوامی برادری دہشت گردی کے خلاف جنگ میں پاکستان کے کلیدی کردار کا اعتراف کرتی ہے۔

خاتون اول ثمینہ علوی نے اس موقع پر کہا کہ صحت مند معاشرے کے قیام کیلئے صنفی بنیاد پر تشدد کا خاتمہ، لڑکیوں کی تعلیم کا فروغ اور صنفی امتیاز کا خاتمہ ناگزیر ہے۔

دوسری جانب صدر مملکت ڈاکٹر عارف علوی نے خواتین کے عالمی دن پر اپنے ایک پیغام میں کہا کہ قائداعظم کا قول ہے خواتین کی طاقت قلم اور تلوار سے زیادہ ہے۔

ڈاکٹر عارف علوی نے یہ بھی کہا کہ  تعلیم ، ملازمتوں میں یکساں مواقع کی فراہمی پر اتفاق کرتے ہیں، خواتین کی ہر جگہ حفاظت ، وراثت میں حصہ یقینی بناناہوگا ۔

اسلام آباد میں عورت مارچ کے شرکاءپر پتھراﺅ

اپنے پیغام میں صدر مملکت ڈاکٹر عارف علوی نے مزید کہا کہ پاکستان بطور ریاست اور شہریوں کو خواتین کا تشدد سے بچاؤ یقینی بناناہوگا۔

یاد رہے کہ پاکستان سمیت دنیا بھر میں آج خواتین کا عالمی دن منایا جارہا ہے۔

اقوام متحدہ نے 1656 میں 8 مارچ کو عورتوں کے عالمی دن کے طور پر منانے کا فیصلہ کیا تھا جبکہ اس کا مقصد خواتین کی سماجی، سیاسی اور اقتصادی جدوجہد کو خراج تحسین پیش کرنا ہے۔

امریکہ میں سوشلسٹ پارٹی کی جانب سے 1909 میں 28 فروری کو خواتین کا دن منایا گیا جس کے بعد 1910 میں خواتین کے حوالے سے ایک عالمی کانفرنس میں تجویز کیا گیا کہ یہ دن سالانہ طور پر منایا جانا چاہیے۔ اس کانفرنس میں 17 ممالک کی 100 خواتین نے اس خیال کو متفقہ طور پر منظور کیا۔