عورت مارچ کے حوالے سے پاکستان الیکٹرونک میڈیا ریگولیٹری اتھارٹی (پیمرا) کی جانب سے تمام نیوز چینلز کو ہدایات کا نوٹس جاری کردیا ہے۔

پیمرا کی جانب سے عورت مارچ کے حوالے سے جاری کردہ خصوصی نوٹس میں کہا گیا ہے کہ کچھ نیوز چینلز عورت مارچ سے متعلق متنازعہ مواد نشر کررہے ہیں جبکہ ایسا مواد نشر کرنا مذہبی، معاشرتی، ثقافتی اقدار کے خلاف ہے اس لئے تمام ٹی وی چینلز لاہور ہائیکورٹ کے فیصلے پر عملدرآمد کریں۔

پیمرا کا کہنا تھا کہ متنازع موادنشر کرنامذہبی، اخلاقی، سماجی، ثقافتی طور پر غیر مناسب ہے، خواتین سے متعلق متنازع مواد سےعوام کے جذبات مجروح ہوتے ہیں اسی سبب ایسا مواد ٹی وی چینلز پر نشر نہیں کیا جاسکتا۔

خواتین کو بااختیار بنانا موجودہ حکومت کی اہم ترجیح ہے، معاون خصوصی اطلاعات

پیمرا کو سوشل میڈیا پلیٹ فارمز سے خواتین سے متعلق متنازع مواد کی شکایات ملی ہیں ، اتھارٹی کو بھی ٹی وی چینلز پرمتنازع نعرے، ڈسکشن نشر ہونے کی شکایات ملی ہیں جبکہ پاکستان سٹیزن پورٹل، پیمرا کمپلینٹ اور کال سینٹر پر بھی شکایات درج کرائی گئی ہیں۔

پیمرا کے مطابق خواتین سے متعلق متنازع مواد نشرکرنا پیمرا کوڈ آف کنڈکٹ کی خلاف ورزی ہے، قومی اسمبلی کی قائمہ کمیٹی اطلاعات ونشریات نے بھی متقفہ طور پر تحفظات کا اظہار کیا ہے اور کمیٹی نے خواتین کےعالمی دن کے حوالے سے احتیاط پر زور دیا ہے۔

ہدایت نامہ میں کہا گیا ٹی وی چینلزخواتین سے متعلق نازیبابینرز،نعرے،ڈسکشن نشرکرنے سے اجتناب کریں۔

8 مارچ، خواتین کا عالمی دن

 خواتین کا عالمی دن ہر سال 8 مارچ کو منایا جاتا ہے۔ یہ دن خواتین کے حقوق اجاگر کرنے کے حوالے سے مختص ہے۔

امریکہ میں سوشلسٹ پارٹی کی جانب سے 1909 میں 28 فروری کو خواتین کا دن منایا گیا جس کے بعد 1910 میں خواتین کے حوالے سے ایک عالمی کانفرنس میں تجویز کیا گیا کہ یہ دن سالانہ طور پر منایا جانا چاہیے۔ اس کانفرنس میں 17 ممالک کی 100 خواتین نے اس خیال کو متفقہ طور پر منظور کیا۔

یہ پہلی مرتبہ 1911 میں آسٹریا، ڈنمارک، جرمنی اور سوئٹزر لینڈ میں منایا گیا۔ اس حساب سے رواں برس 108 یوم خواتین منایا جا رہا ہے۔

1917 میں سویت روس میں خواتین کو ووٹ کا حق ملنے کے وجہ سے وہاں 8 مارچ کو قومی تعطیل ہونے لگی۔ وہاں سوشلسٹ مہم کے تحت اسے باقاعدہ منایا جانے لگا۔

اسے 1975 میں اقوامِ متحدہ نے بھی اپنا لیا۔

کئی ممالک میں خواتین کے عالمی دن پر تعطیل ہوتی ہے۔ کئی ملکوں میں اسے احتجاج کے دن کے طور پر منایا جاتا ہے جبکہ بعض میں اس دن نسوانیت کا جشن منایا جاتا ہے