امیر جماعت اسلامی سراج الحق نے کہا ہے کہ وزیراعظم کوئی ایسا گر بتائیں جس سے ایک گھرانے کا تین ہزار میں گزارہ ہوجائے۔

تفصیلات کے مطابق امیر جماعت اسلامی پاکستان سینیٹر سراج الحق نے عمران خان پر تنقید کرتے ہوئے کہا کہ وزیراعظم خود کہتے تھے کہ ان کا دو لاکھ میں گزارہ نہیں ہوتا تو  غریبوں کو کم از اکم اتنا گزارہ الاﺅنس ضرور دیا جائے جس سے وہ دو وقت کا کھانا کھا سکیں۔

سراج الحق نے یہ بھی کہا کہ کرونا وائرس باہر سے درآمد ہوا لیکن حکومتی ناقص پالیسیوں سے پھیلا ہے جبکہ باہر سے آنے والوں کی  بھی بروقت سکریننگ نہیں کی جس سے بیماری کو پھیلنے کا موقع ملا۔

اپنے بیان میں سراج الحق نے کہا کہ عوام جمعرات کو شب دعا اور جمعتہ المبارک کو یوم توبہ و استغفار کے طور پر منائیں، ہم اجتماعی توبہ و استغفار اور رجوع الی اللہ سے ہی اس وباءسے نجات حاصل کرسکتے ہیں۔

حکومت نے کرونا پر چائنا کی بجائے اٹلی کا ماڈل اپنایا ہے، سراج الحق

 امیر جماعت اسلامی پاکستان سینیٹر سراج الحق نے مزید کہا کہ جماعت اسلامی اور الخدمت کے رضا کاروں کی کمیٹیوں کو محلوں کی سطح پر منظم کیا جائے گا۔

واضح رہے آج ملک میں کورونا وائرس کے آج 69   افراد میں مہلک وائرس کی تشخیص ہوئی جن میں سندھ سے 3  ، پنجاب میں 16  اور خیبرپختونخوا میں 39 ، بلوچستان میں  9  جبکہ اسلام آباد اور گلگت بلتستان میں 1، 1  کورونا وائرس کے کیسز کی تصدیق ہوئی ہے، جس کے بعد ملک بھر میں متاثرہ افراد کی تعداد 1059  تک پہنچ گئی ہے۔

پاکستان میں کوروناوائرس سے متاثرہ مریضوں کی اعداد و شمار کے مطابق اس وقت سندھ میں 413  ،  بلوچستان میں 119 ، خیبرپختونخوا میں 117 ،اسلام آباد میں 16 ، گلگت بلتستان میں 81 ، پنجاب میں 312  اور آزاد کشمیر میں 1 مریض موجود ہے۔