پاکستان مسلم لیگ (ن) کے صدر قائد حزب اختلاف شہباز شریف کو پاکستان میں ایران کے سفیر سید محمد علی حسینی کا خط لکھ دیا ہے۔

خط کے متن میں ایرانی سفیر نے لکھا ہے کہ کورونا سے نمٹنے کے لیے ادویات، ضروری ساز و سامان درکار ہے،  امریکی پابندیوں کی وجہ سے کورونا سے ایرانی عوام کو بچانے اور علاج معالجہ میں مشکلات پیش آرہی ہیں۔

ان کا کہنا تھا کہ اس وقت ایران میں کرونا سے ہونے والی اموات کی بنیادی وجہ ضروری سامان اور ادویات کی عدم فراہمی ہے، امریکی پابندیوں کی وجہ سے مالی وسائل استعمال کرنے میں رکاوٹیں ہیں۔

ایرانی سفیر کا کہنا تھا کورونا وائرس جغرافیے اور سرحدوں سے ماورا ہے اور امریکی پابندیاں اقوام متحدہ کی سلامتی کونسل کی قرارداد نمبر 2231 کی کھلی خلاف ورزی ہیں۔

خط میں کہا گیا ہے کہ کورونا سے درپیش سنگین صورت حال میں کسی قوم کو زندہ رہنے کے حق سے محروم کرنا انسانیت کے خلاف جرم ہے اور امریکی پابندیاں ایرانی قوم کے زندہ رہنے اور صحت کے حق کی سنگین خلاف ورزی ہے۔

انہوں نے کہا کہ یہ پابندیاں بنیادی انسانی حقوق اور عالمی قانون کی خلاف ورزی ہے۔

خیال رہے کہ پاکستان سمیت تمام ہمسایہ ممالک کو مدد کے لئے خط لکھا ہے جبکہ قائد حزب اختلاف کو خط لکھنے کا مقصد ایران میں انسانیت کو لاحق خطرات سے آگاہ کرنا تھا تاکہ اپوزیشن لیڈر ایران پر پابندیوں کو نرم کرنے کے حق میں آواز بلند کریں۔