دنیا بھر میں جاری کورونا وائرس کے باعث ہلاکتوں کی اطلاعات موصول ہورہی تھیں جبکہ اب اسی وائرس کے سبب پہلا پاکستانی جاں بحق ہوگیا ہے۔

دفتر خارجہ نے اٹلی میں کرونا سے جان بحق ہونے والے پہلے پاکستانی کی وفات کی تصدیق کر دی ہے۔

ترجمان دفتر خارجہ ڈاکٹر عائشہ نے اپنے ایک بیان میں بتایا ہے کہ جاں بحق ہونے والے پاکستانی کا نام امتیاز احمد تھا جبکہ61 سالہ امتیاز احمد کا انتقال بدقسمتی سے کرونا وائرس سے ہوا ہے۔

امتیاز احمد میلان سے 100 میل دور بریسیا میں جاں بحق ہوا ہے جبکہ اٹلی میں پاکستانی قونصلیٹ اس حوالے سے متاثرہ خاندان اور اطالوی انتظامیہ سے رابطے میں ہیں۔

ذرائع کا کہنا ہے کہ اٹلی میں کورونا وائرس کے سبب جاں بحق ہونے والا پہلا پاکستانی امتیاز احمد گذشتہ کئی برس سے اٹلی میں مقیم تھا۔

کورونا وائرس کے خلاف جنگ، چین کا کردار متاثر کن قرار

میت کی وطن واپسی کے حوالے سے دفتر خارجہ اطالوی دفتر خارجہ سے رابطے میں ہے تاحال اطالوی حکومت نے کوئی فیصلہ نہیں کیا گیا ہے۔

یاد رہے کہ چین کے شہر ووہان میں پھوٹنے والا وائرس دنیا کے 106 ممالک میں پہنچ چکا ہے جس کی وجہ سے مجموعی طور پر آج تک 4325 مریض جاں بحق ہوئے جبکہ دنیا بھر میں متاثرہ افراد کی تعداد ایک لاکھ بیس ہزار تک پہنچ گئی ہے۔

پاکستان میں کرونا کے 20 کیسز رپورٹ ہوچکے ہیں، تمام مریض حال ہی میں اُن ممالک سے وطن واپس پہنچے ہیں جہاں کرونا وائرس پھیل چکا تھا۔

اس سے قبل سندھ میں کروناوائرس کے مزید 2 نئے کیس اور کوئٹہ میں 1 کیس سامنے آگئے ، جس کے بعد سندھ بھر میں کرونا وائرس کے کیسز کی تعداد15 ، کوئٹہ میں 1 جبکہ پاکستان میں وائرس سے متاثرہ مریضوں کی تعداد 19  ہوگئی ہے ۔

محکمہ صحت سندھ کی جانب سے جاری اعدادوشمار کے مطابق متاثرہ افراد میں سے ایک کا تعلق حیدر آباد اور دوسرے کا کراچی سے ہے۔

دوسری جانب وزیر اعظم کے معاون خصوصی ڈاکٹر ظفر مرزا کی زیر صدارت ایمرجنسی کور گروپ کا اجلاس ہوا جس میں کرونا وائرس کے متعلق بدلتی ہوئی صورتحال کا جائزہ لیا گیا۔

خیال رہے کہ گزشتہ روز کراچی میں کرونا وائرس کے ایک روز میں 8 کیسز سامنے آئے تھے۔ تازہ ترین اعدادوشمار کے مطابق سندھ میں کرونا سے متاثرہ افراد کی تعداد 13 جبکہ ملک بھر میں تعداد 16 ہو گئی تھی جن میں سے کراچی میں 13، اسلام آباد میں 2 جبکہ گلگت بلتستان سے ایک کیس کی تصدیق ہوئی تھی۔

ان مریضوں میں سے سب سے پہلے سامنے آنے والے کراچی کے یحییٰ جعفری نامی نوجوان کو صحت یابی کے بعد اسپتال سے ڈسچارج کردیا گیا ہے جب کہ باقی تمام متاثرہ افراد زیر علاج ہیں۔