ترجمان وزارت مذہبی امور کے مطابق سرکاری حج اسکیم کی قرعہ اندازی آج  شام 4 بجے ہو گی ۔

تفصیلات کے مطابق ترجمان وزارت مذہبی امور نے اپنے بیان میں کہا ہے کہ وزارت مذہبی امور نےحج قرعہ اندازی کے انتظامات مکمل کرلئے ہیں، پیر نور الحق قادری خوش نصیبوں کے ناموں کا اعلان کریں گے۔

ترجمان کا کہنا تھا کہ درخواست گزاروں کو نتائج کی اطلاع بذریعہ ایس ایم ایس ملے گی، قرعہ اندازی کےنتائج وزارت کی ویب سائٹ پر اپ لوڈ کئے جائیں گے۔

یاد رہے چند روز قبل ترجمان مذہبی امور نے سرکاری حج اسکیم کی قرعہ اندازی کی تاریخ کا اعلان کرتے ہوئے کہا تھا کہ اب تک ملک بھرکے بینکوں کو1  لاکھ چالیس ہزار حج درخواستیں وصول ہوچکی ہے۔

خیال رہے کہ وزارت مذہبی امور نےحج پالیسی 2020 جاری کردی جس کے تحت رواں سال ایک لاکھ 79 ہزار 210 پاکستانی حج ادا کرسکیں گے۔

وزیراعظم کی معاون خصوصی فردوس عاشق اعوان کےہمراہ پریس کانفرنس کے دوران نور الحق قادری نے کہا تھا کہ رواں برس ایک لاکھ 84 ہزار 210 کے بجائے ایک لاکھ 79 ہزار210 عازمین حج کرینگے۔

وزیر مذہبی امور نے بتایا کہ سپریم کورٹ کے فیصلے کو مد نظر رکھتے ہوئے نجی حج آپریٹرز میں یکساں کوٹہ تقسیم کیا جائے گا۔

انہوں نے بتایا کہ شمالی ریجن کے لیے رواں سال حج پیکج 4 لاکھ 90 ہزار روپے کا ہوگا جس میں اسلام آباد، پشاور، لاہور، سیالکوٹ، ملتان اور رحیم یار خان شامل ہیں۔

یاد رہے کہ حج درخواستوں کی وصولی میں 2 دن کی توسیع کی گئی تھی ، جس کے تحت حج درخواستوں کی وصولی 8 مارچ تک جاری رہی۔

واضح رہے کہ سال 2020 کے لیے حج درخواستوں کی وصولی کا آغاز 25 فروری سے ہوا تھا۔