وزیر خارجہ شاہ محمود قریشی نے کہا ہے کہ  کرنل مجیب الرحمان  شہید جیسے دلیر اور نڈرافسران قوم کا فخر ہیں۔

تفصیلات کے مطابق  ڈیرہ اسماعیل خان میں دہشت گردوں کے ناپاک عزائم کو خاک میں ملانے پر وزیر خارجہ شاہ محمود قریشی نے افواج پاکستان کے کردار کو سراہا۔

وزیر خارجہ  نے کہا کہ ڈیرہ اسماعیل خان میں دہشت گردوں کے ناپاک عزائم کو خاک میں ملانا ہماری مسلح افواج کی  بہادری اور پیشہ وارانہ مہارت کا منہ بولتا ثبوت ہے۔

شاہ محمود قریشی  نے مزید کہا کہ  ارض پاک کو دہشتگردی سے پاک کرنے کے حوالے سے افواج پاکستان کا کردار قابلِ تحسین ہے۔

ڈی آئی خان، سیکیورٹی فورسز کی کارروائی، 2 دہشتگرد ہلاک، کرنل مجیب الرحمان شہید

انہوں نے کہا کہ  کرنل مجیب الرحمان  شہید جیسے دلیر اور نڈرافسران قوم کا فخر ہیں۔ پوری قوم کرنل مجیب الرحمان شہید کی شجاعت کو سلام پیش کرتی ہے۔

وزیر خارجہ نے دعا کی کہ اللہ تعالیٰ کرنل مجیب الرحمان شہید کے درجات بلند اور پسماندگان کو صبرِ جمیل عطاء فرمائیں۔

وزیراعظم نے شہید کرنل مجیب الرحمان کو خراج عقیدت پیش کیا اور ان کے درجات کی بلندی کی دعا کی تھی ۔

وزیر اعظم کا کہنا تھا کہ پوری قوم افواج پاکستان اور سیکیورٹی اداروں کی قربانیوں کی معترف ہے، سیکیورٹی فورسز کی بے مثال قربانیوں کے باعث دہشتگردی کا خاتمہ ہوا، سیکیورٹی فورسز کی قربانیوں کی بدولت ہی امن کی شمع روشن ہوئی ہے۔

واضح رہے کہ  آج صبح  سیکیورٹی فورسز نے ڈیرہ اسماعیل خان میں انٹیلی جنس کی بنیاد پر بڑی کارروائی کرتے ہوئے 2 انتہائی مطلوب دہشتگرد ہلاک کر دیے تھے جبکہ فائرنگ کے تبادلے میں کرنل مجیب الرحمان شہید ہوگئے تھے۔

آپریشن ٹانک کے قریب دہشت گردوں کے خفیہ ٹھکانے پر کیا گیا تھا۔  کارروائی کے دوران بھاری مقدار میں اسلحہ اور گولہ باردو  بھی برآمد  کیا گیا ہے۔