صدر مملکت ڈاکٹر عارف علوی نے کہا ہے کہ قطر پاکستان میں سرمایہ کاری کے ابھرتے ہوئے مواقعوں سے فائدہ اٹھا سکتا ہے۔

تفصیلات کے مطابق صدر مملکت ڈاکٹر عارف علوی سے قطر کے سبکدوش ہونے والے سفیر صقر بن مبارک المنصوری کی ملاقات ہوئی ، جس میں صدر مملکت نے قطری سفیر کو بھارتی مقبوضہ جموں وکشمیر میں انسانی حقوق کی پامالیوں سے بھی آگاہ کیا ۔

اس موقع پر صدر مملکت نے سبکدوش ہونے والے سفیر کو پاکستان میں اپنی ذمہ داری پوری کرنے پر مبارکباد پیش کی اور دونوں برادر ممالک کے مابین دوطرفہ تعلقات میں بہتری لانے کے لئے ان کی کاوشوں کو سراہا۔

 ملاقات میں ڈاکٹر عارف علوی نے کہا کہ پاکستان قطر کے ساتھ برادرانہ دوطرفہ تعلقات کو ایک مضبوط سیاسی اور معاشی شراکت میں تبدیل کرنے کے لئے پرعزم ہے۔

 صدر مملکت نے یہ بھی کہا کہ کراچی اور حمد بندرگاہوں کے درمیان براہ راست رابطے اور پاکستان کے لئے قطری فوڈ مارکیٹ تک رسائی کے بعد باہمی تجارت میں نمایاں بہتری آئی ہے۔

  ڈاکٹر عارف علوی نے افغان امن مذاکرات کی میزبانی اور تعاون میں قطر کے اہم کردار کو سراہتے ہوئے اس امید کا اظہار کیاکہ تمام فریقین اس معاہدے کی پاسداری کریں گے اور افغانستان میں قیام امن کے خواب کو حقیقت میں بدل دیں گے۔

قطر کے سبکدوش ہونے والے سفیر  سے ہونے والی ملاقات میں صدر مملکت ڈاکٹر عارف علوی نے او آئی سی سمیت عالمی برادری پر زور دیا کہ وہ تنازعہ کشمیر کے پرامن حل کے ساتھ ساتھ بھارت میں اقلیتوں کے تحفظ میں بھی اپنا کردار ادا کرے۔

واضح رہے اس سے قبل صدر مملکت ڈاکٹر عارف علوی نے عالمی رسک مینجمنٹ کانفرنس سے خطاب کرتے ہوئے کہا تھا کہ کسی بھی تنظیم کی ترقی میں بہتر گورننس کلیدی اہمیت رکھتی ہے، پاکستان نے کئی محاذوں پر کامیابی حاصل کی ہیں۔