وزیراعظم آزاد کشمیر راجہ محمد فاروق حیدر کی زیر صدارت اعلی سطحی اجلاس ہوا ،جس میں ویڈیو لنک کے ذریعے مختلف ذمہ داران  نے اجلاس میں شرکت کی۔

اس موقع پر وزیراعظم آزاد کشمیر راجہ محمد فاروق حیدر نے کہا ہے کہ بیرون آزاد کشمیر سے اب کسی فرد کو آزادکشمیر آنے کی اجازت نہیں ہوگی ، جو لوگ گئے ہیں ان کی واپسی پر بھی فوری پابندی لگا دی گئی ہے۔

راجہ محمد فاروق حیدر نے یہ بھی کہا کہ آزاد کشمیر کے وہ شہری جو باہر مقیم ہیں اپنا قیام وہیں رکھیں آزادکشمیر کے انٹری پوائنٹس کو مکمل بند کر دیا گیا ہے، سوائے مال بردار گاڑیوں کے کسی کو بھی پیدل سفر کرنے کی اجازت نہیں دی جائیگی راجہ فاروق حیدر

آزاد کشمیر میں کروناوائرس کا پہلا کیس 

اپنے بیان میں وزیراعظم آزاد کشمیر راجہ محمد فاروق حیدر نے مزید کہا کہ یہ اقدامات آپ کے پیاروں کی حفاظت کے لیے ہیں براے مہربانی ایک ماہ تک آزادکشمیر کا سفر نا کریں ۔

یاد رہے اس سے قبل آزادجموں وکشمیرکے وزیراعظم نے کہا تھا کہ کوروناسے نمٹنے کے لئے فنڈ کے قیام کی منظوری دی ہے جو کوروناسے متاثرہ مریضوں کے علاج معالجے پرخرچ کئے جائیں گے۔

اس موقع پر راجہ فارو ق حیدرخان نے کمشنروں کوہدایت کی کہ وہ آزادجموں وکشمیرکے تمام تین ڈویژنوں میں قرنطینہ مراکزقائم کریں اورانہیں یومیہ بنیادوں پراُن کی رپورٹ پیش کریں۔

واضح رہے اس سے قبل آزادکشمیرمیں بھی کرونا کاپہلا مریض سامنے آگیا تھا ،وزیراعظم راجہ فاروق حیدر نے تصدیق کرتے ہوئے کہا تھا کہ تفتان سے آنے والے شہری میں وائرس کی تصدیق ہوئی ۔

وزیراعظم آزادکشمیرمیں ایران سے آنے والے زائرین کو ڈیرہ اسماعیل خان میں رکھنے کی درخواست کردی  جبکہ ساتھ ساتھ وزیراعظم راجہ فاروق حیدر نے وزیر صحت آزادکشمیر کو فوکل پرسن مقرر کردیا تھا ۔