پاکستان میں کورونا وائرس کے باعث خاتون انتقال کرگئیں ، جس کے بعد اموات کی تعداد 8 ہوگئی جبکہ متاثرہ مریضوں کی تعداد 1000 سے تجاوز کر گئی  ہے۔

تفصیلات کے راولپنڈی ایم ایچ اسپتال میں خاتون کرونا وائرس کے باعث جاں بحق ہوگئی ،کیپٹن ر شاہدہ 21 مارچ سے ایم ایچ اسپتال میں زیر علاج تھی۔

کمشنر راولپنڈی نے  خاتون کی کرونا سے موت  کی تصدیق  کرتے ہوئے کہا کہوہ برطانیہ سے پاکستان پہنچی تھیں ، خاتون کا تعلق سوہاوہ سے ہے، میت سوہاوہ روانہ کردی گئی۔

ملک میں کورونا سے صحتیاب مریضوں کی کل تعداد 19 ہو گئی

یاد رہے پاکستان میں کورونا وائرس سے اب تک مجموعی طور پر 8 افراد جاں بحق ہوچکے ہیں جب کہ  ملک میں کورونا سے صحتیاب مریضوں کی کل تعداد 19 ہو گئی ہے ۔

واضح رہے آج ملک میں کورونا وائرس کے آج 65  افراد میں مہلک وائرس کی تشخیص ہوئی جن میں سندھ سے 3  ، پنجاب میں 16  اور خیبرپختونخوا میں 39 ، بلوچستان میں  5  جبکہ اسلام آباد اور گلگت بلتستان میں 1، 1  کورونا وائرس کے کیسز کی تصدیق ہوئی ہے، جس کے بعد ملک بھر میں متاثرہ افراد کی تعداد 1055  تک پہنچ گئی ہے۔

پاکستان میں کوروناوائرس سے متاثرہ مریضوں کی اعداد و شمار کے مطابق اس وقت سندھ میں 413  ،  بلوچستان میں 115 ، خیبرپختونخوا میں 117 ،اسلام آباد میں 16 ، گلگت بلتستان میں 81 ، پنجاب میں 312  اور آزاد کشمیر میں 1 مریض موجود ہے۔